საქართველოს ბანკის მხარდაჭერით, დათო გორგილაძის საავტორო გადაცემა – „გორგილაძის აუტანელი სიმსუბუქე“ გრძელდება. რამდენიმე წლის წინ დაწყებული პროექტი ახალ სიცოცხლეს ახალ პლატფორმაზე, ამჯერად Youtube-ზე იწყებს.
ვიდეოინტერვიუების სერია, რომელიც უკვე მრავალ ადამიანს, ამბავს, მოსაზრებებს, გამოცდილებებსა და, რაც მთავარია, ათასობით მაყურებელს აერთიანებს, გასული წლის ბოლოს დაიხურა. დღემდე არსებობდა მოლოდინი, რომ ის აუცილებლად გაგრძელდებოდა, რადგან, როგორც თავად დათო გორგილაძე ამბობს, ჯერ კიდევ ბევრი კითხვაა დასასმელი.
და ასეც მოხდა, დათო გორგილაძე არ გაჩერდა. ქვემოთ თავად გვიყვება, რას უნდა ველოდოთ ამჯერად ბევრისთვის საყვარელი პროექტის ამ ახალ ეტაპზე.
პაუზა, როგორც სამზადისი
„ყველა შოუს თავისი სიცოცხლის ძაფი აქვს. როდის გაწყდება ეს ძაფი, ბევრ რამეზეა დამოკიდებული – ჯგუფზე, რომელიც მას ქმნის, წამყვანზე, რომელიც მისი სახეა, ადამიანებზე, ვინც ამ შოუს სტუმრობენ. თუმცა შოუს ბედს, საბოლოოდ, მაინც მაყურებელი წყვეტს. ისეც ხდება, რომ მაყურებელი პროექტს მოიბეზრებს, ვეღარ ივსება და ვეღარ მდიდრდება მისი ყურებით. ამას დაკვირვებული თვალი იოლად გრძნობს და თავმოყვარეობის ამბავია, რომ დროულად შეწყვიტო – არც შენ იწვალო, არც სხვა აწვალო.
„გორგილაძის აუტანელი სიმსუბუქის” შემთხვევაში ძაფი დროზე ბევრად ადრე გადაიჭრა, პროექტი თავისი წარმატების პიკში იყო. ამიტომაც ჩვენ არათუ დაბრუნებაზე ვფიქრობდით, წამითაც არ გაგვივლია თავში, რომ არ დავბრუნდებოდით. სიმართლე ითქვას, ეს დრო სრულად მომზადებას, ახალ პლატფორმაზე გადაბარგებას, პარტნიორებთან ურთიერთობებს, შეფუთვასა და დაგეგმვას მოვახმარეთ. ხელის ჩაქნევის დრო არც გვქონია.”
ახალი „სიმსუბუქე“
„სიმსუბუქის” მთავარი „კოზირი”, ჩემი აზრით, რესპონდენტების გულწრფელობის მოპოვება და მაყურებლისა თუ მსმენელისთვის მათი ბუნებრიობასთან ყველაზე მიახლოებული ფორმით ჩვენებაა. არასდროს დაგვიმალავს, რომ ჩვენი მიზანი ისაა, რომ ინტერვიუს დასრულების შემდეგ ადამიანს სისავსის განცდა დარჩეს, რაიმე კარგის გაკეთება მოუნდეს, თუნდაც ეს დიდი ხნის უნახავ მეგობართან მოკითხვის ზარი იყოს.
ყალბი თავმდაბლობის გარეშე ვიტყვი, რომ ჩვენი ამბიცია გარკვეული საარქივო ფონდის შექმნაცაა, რომელიც საინტერესო, მნიშვნელოვან ადამიანს ისეთებად შეინახავს, როგორებიც ისინი ახლა, ამ მომენტში არიან. ცხადია, რომ ალაგ-ალაგ სიახლის გამოკრთომებიც გვექნება, მაგრამ ძირითადად „სიმსუბუქე” ისეთივე იქნება, როგორიც ხალხს მოსწონს.”
არ გაჩერდე
საქართველოს ბანკი გადაცემის მთავარი პარტნიორია. ორივე მხარე შორს ვიყავით იმ აზრისგან, რომ პარტნიორობა სტერილური, შაბლონური, ხელოვნური ყოფილიყო. ვეძებდით გზებს, რომ შინაარსობრივად ძალიან ზუსტი გადაკვეთის წერტილი გვეპოვა. მივხვდით, რომ საქართველოს ბანკის სლოგანი ზუსტად ერგება იმ თემებს, რომლებზეც ჩვენ ყოველთვის ვსაუბრობთ სტუმრებთან. ასე დაემატა გადაცემის ახალ ფორმატს რუბრიკა „არ გაჩერდე” და ძალიან გვეიმედება. არ გაჩერების, არ დანებების, საკუთარ თავში ძალების პოვნისა და გზის გაგრძელების მაგალითები ძალიან მნიშვნელოვანი სალაპარაკოა, რადგანაც ბევრი ადამიანისთვისაა ინსპირაციისა თუ მოტივაციის მიმცემი.
როგორც იტყვიან, voilà. ყველაფერი ბუნებრივად და საინტერესოდ ჩაეწერა კონტექსტში და „გორგილაძის აუტანელ სიმსუბუქეში” გაჩნდა რუბრიკა „არ გაჩერდე”.
„არ გაჩერდე“ გააერთიანებს იმ ადამიანების ისტორიას, რომლებიც ბევრი დაბრკოლებისა თუ ხელისშემშლელი გარემოების მიუხედავად, მაინც არ ჩერდებიან. ისიც უნდა ითქვას, რომ ამ ფრაზის კონცეფციის საუკეთესო გამოვლინება თავად დათო გორგილაძე და მისი გუნდია, რომლებიც ერთი შეხედვით გამოუვალ სიტუაციაშიც კი არც ერთი წამით არ გაჩერებულან და პროექტის დახურვიდან სულ რაღაც სამ თვეში ახალი გეგმით, პლატფორმითა და კონცეფციით გამოჩნდნენ მაყურებლის წინაშე.
ისღა დაგვრჩენია, დაველოდოთ დათო გორგილაძის საავტორო გადაცემის, “გორგილაძის აუტანელი სიმსუბუქის“ ახალ სიცოცხლეს Youtube-ზე, მანამდე კი გამოვიწეროთ არხი, რომ არ გამოგვრჩეს არცერთი სიახლე პროექტის შესახებ.