უნგრეთში 4 აგვისტოდან 6 აგვისტოს ჩათვლით გაიმართა ერთ-ერთი ყველაზე პრესტიჟული ტურნირი ჯუდოში- ბუდაპეშტის მასტერსი. ტურნირში 22 ქვეყნის ჯუდოკები იღებდნენ მონაწილეობას. შეჯიბრებაში ჩართულნი მხოლოდ რეიტინგის მოწინავე სპორტსმენები იყვნენ, მათ შორის, რა თქმა უნდა, ქართველი ჯუდოკებიც: 12 კაცი და 2 ქალი. როგორც ამ მნიშვნელოვან ტურნირში, ისე ზოგადად საქართველოს ეროვნული ოლიმპიური ნაკრების გენერალური სპონსორი საქართველოს ბანკია.
უნდა ითქვას, რომ ტურნირის დაწყებამდე ჩვენს ნაკრებს გამოაკლდნენ გამორჩეული ჯუდოკები: ლუხუმ ჩხვიმიანი (60 კგ), ბექა ღვინიაშვილი (90 კგ) და ეროვნული ნაკრების კაპიტანი, ვარლამ ლიპარტელიანი (100 კგ). მიუხედავად დიდი დანაკლისისა, ქართველთა განაცხადი მაინც მძლავრად და იმედის მომცემად გამოიყურებოდა:
გიორგი სარდალაშვილი, თემურ ნოზაძე (60 კგ.); ვაჟა მარგველაშვილი (66 კგ.); გიორგი ტერაშვილი, ლაშა შავდათუაშვილი (73 კგ.); ტატო გრიგალაშვილი (81 კგ); ლაშა ბექაური, ლუკა მაისურაძე (90 კგ.); ილია სულამანიძე, ონისე სანებლიძე (100 კგ.); გურამ თუშიშვილი, გელა ზაალიშვილი, საბა ინანეიშვილი (+100 კგ); ეთერ ლიპარტელიანი (57 კგ.); სოფიო სომხიშვილი (+78 კგ.).
მოლოდინები გამართლდა და ჩვენი სპორტსმენებისთვის ბუდაპეშტის მასტერსი წარმატებული და ბევრი ემოციური თუ სიმბოლური მომენტით დახუნძლული გამოდგა. ქართველმა ჯუდოკებმა შეჯიბრებაში სულ 6 მედლის მოპოვება მოახერხეს:
🥉 ლაშა შავდათუაშვილი (73 კგ.)
ძალიან გამოცდილი და ტიტულიანი სპორტსმენი ლაშა შავდათუაშვილი ბრინჯაოს ფინალში დაუპირისპირდა ახალგაზრდა და პერსპექტიულ ქართველ სპორტსმენ გიორგი ტერაშვილს. ძალიან დაძაბულ და საინტერესო დაპირისპირებაში 31 წლის ლაშამ თავისი გამოცდილებით აჯობა 20 წლის გიორგის და ორჯერ ვაზარით მოახერხა მისი დამარცხება. ასე სიმბოლურად მოვიპოვეთ პირველი მედალი უნგრეთში. აქვე უნდა აღინიშნოს, რომ ეს არ იყო ამ ტურნირის ერთადერთი დაპირისპირება მედლისთვის, როცა ტატამის ორივე მხარეს ქართველი ჯუდოკა იდგა.
🥉 ტატო გრიგალაშვილი (81 კგ.)
ტატოს აღნიშნულ ტურნირზე წლევანდლამდე ზედიზედ ორი ოქროს მედალი ჰქონდა მოპოვებული და წელსაც მთავარ ფავორიტად ითვლებოდა თავის წონაში, თუმცა ასეც ხდება ხოლმე. მას საბოლოოდ ბრინჯაოსთვის მოუწია ჭიდაობა და ძალიან ძლიერ იაპონელ მეტოქეს, კენია კოჰარას ვაზარის წყალობით სძლია. ესეც მეორე ბრინჯაო საქართველოსთვის.
🥉 ილია სულამანიძე (100 კგ.)
რთული გზა გაიარა მძიმეწონოსანმა ილიამ ბრინჯაოს ფინალამდე, ბოლოს ისე აღმოჩნდა, რომ მისი მეტოქე, ნიდერლანდელი ჯუდოკა მიხაელ კორე ტრავმის გამო ვერ გამოცხადდა საჭიდაოდ და ავტომატურად მესამე ბრინჯაოც მოვიპოვეთ.
🥉 გელა ზაალიშვილი (+100 კგ)
დიდ უპირატესობას ფლობდა კიდევ ერთი მძიმეწონოსანი ქართველი ჯუდოკა, გელა ზაალიშვილი ბრინჯაოს ფინალში და საბოლოოდ, ეს უპირატესობა დაპირისპირების მიწურულს იპონშიც გადაიზარდა. იაპონელი კოკორო კაგეურას დამარცხების შედეგად გვერგო ჩვენ მეოთხე ბრინჯაოც.
🥇🥈 ლაშა ბექაური და ლუკა მაისურაძე (90 კგ.)
ტურნირის ბოლო დღეს კი მოხდა ძალიან სიმბოლური და მნიშვნელოვანი რამ – ქართული ფინალი 90 კილოგრამ წონით კატეგორიაში. ერთმანეთისთვის უკვე ტრადიციული მეტოქეები, ლაშა ბექაური და ლუკა მაისურაძე ბუდაპეშტის მასტერსის ოქროს მედლისთვის დაუპირისპირდნენ ერთმანეთს. ცხადია, შეხვედრის დასრულებამდე ჩვენთვის ნათელი იყო ის, რომ საქართველოს ანგარიშს კიდევ ორი მედალი შეემატებოდა, სხვა დანარჩენი კი უკვე ფორმალობა იყო. დიდი ალბათობა იყო იმისა, რომ ბოლო წამამდე ძალიან დაძაბული შეხვედრა გამოვიდოდა და ასეც მოხდა – ძირითადი დროის ამოწურვის შემდეგ „გოლდენ სქორში“ სამი ყვითელი ბარათის (შიდოს) ხარჯზე მოახერხა ლაშა ბექაურმა გამარჯვების მოპოვება. ოლიმპიურმა ჩემპიონმა დაამარცხა ლუკა მაისურაძე და მათ პირად ტრადიციულ დაპირისპირებაშიც ანგარიში გაათანაბრა 2-2.
1 ოქრო, 1 ვერცხლი და 4 ბრინჯაო – ასეთია საქართველოს ნაკრების მონაპოვარი ბუდაპეშტის მასტერზე, ამ შედეგით 22-ქვეყნიან საერთო ჩათვლაში ჩვენ მოვახერხეთ და პირველადგილოსანი იაპონიისა და მეორეადგილოსანი საფრანგეთის შემდეგ მესამე ადგილზე გავედით.