ევრო 2024-ის საკვალიფიკაციო ეტაპის ბოლოსწინა შეხვედრაში საქართველოს ეროვნულმა ნაკრებმა შოტლანდიის წინააღმდეგ ფრედ ითამაშა:
საქართველო V შოტლანდია 2-2
ნაპოლისა და საქართველოს ლიდერმა, ხვიჩა კვარაცხელიამ ამჯერადაც შესანიშნავი მატჩი ჩაატარა ორი ულამაზესი გოლის გატანა მოახერხა – თბილისში, ბორის პაიჭაძის სახელობის ეროვნულ მოედანზე გამართული შეხვედრა კვარას კარიერაში ნამდვილად ერთ-ერთი გამორჩეული 90 წუთი იყო, გოლების გარდა ბევრი ლამაზი და ხეირიანი მომენტითა და, რაც მთავარია, ლიდერული თვისებების საუკეთესო გამოვლინებებით.
ეროვნული ნაკრების მთავარმა მწვრთნელმა, ვილი სანიოლმა ჩვენთვის უკვე კარგად ნაცნობი ტაქტიკა და წინასწარ სავარაუდო შემადგენლობა შეარჩია. 3-4-1-2 სათამაშო სქემა და ძირითადი თერთმეტეული:
მამარდაშვილი – კვერკველია, კაშია, ლოჩოშვილი – კაკაბაძე, ქოჩორაშვილი, კვეკვესკირი შენგელია – ჩაკვეტაძე – კვარაცხელია, მიქაუტაძე.
შოტლანდიელთა თავკაცმა, სტივ კლარკმა კი შემდეგი ძირითადი თერთმეტეული შეარჩია ჩვენთან სათამაშოდ (4-3-3):
კლარკი – პატერსონი, პორტეუსი, მაკენა, ტეილორი – გილმორი, მაკგრეგორი, მაკტომინეი – მაკგინი, დაიკსი, კრისტი.
შოტლანდიას ორჯერ ვუგებდით, თუმცა ორივეჯერ მოახერხეს გათანაბრება – კვარას გოლს პირველ შემთხვევაში მანჩესტერ იუნაიტედის ნახევარმცველმა, სკოტ მაკტომინეიმ უპასუხა, მეორე შემთხვევაში კი შეცვლაზე შემოსულმა ლოურენს შენკლენდმა. განსაკუთრებით დასანანი იყო მეორე გაშვებული გოლი უკვე დამატებით დროში მატჩის დასრულებამდე 5 წუთით ადრე.
შეხვედრიდან რამდენიმე ქართველი ფეხბურთელის გამორჩევა შეიძლება: პირველ რიგში, რა თქმა უნდა, კვარა, თუმცა არანაკლებ გამორჩეული იყო ინგლისური ვოტფორდის შემტევი ნახევარმცველი და ქართული ფეხბურთის იმედი – გიორგი ჩაკვეტაძე. ჩაკვე ორივე გოლის ეპიზოდში მონაწილეობდა: ჯერ პრე-ასისტი გააკეთა, მერე კი ასისტიც. მისი გამჭოლი პასები იყო მთავარი იარაღი ლამის ყველა შეტევის პირველ ეტაპზე. ცენტრში შემოწეული, ათ ნომერზე მოთამაშე გიორგი ჩაკვეტაძე დღესდღეობით და მომავალშიც ჩვენი ნაკრების საკვანძო ფეხბურთელი იქნება. კარგი მატჩი ჰქონდა ნაკრებში დაბრუნებულ ოთარ კაკაბაძესაც, რომელმაც სწრაფი გამჭოლი ჩაწოდებით გაატანინა კვარას.
ნახევარდაცვის ცენტრში სოლიდური იყო გიორგი ქოჩორაშვილი, დაცვის ცენტრიდან კი ლუკა ლოჩოშვილი უნდა ვახსენოთ. საერთო ჯამში ცალსახად პოზიტიურად უნდა შეჯამდეს თითოეული მოთამაშის და, ზოგადად, ნაკრების გარჯა. ბოლო წუთებზე გოლი მცირე უყურადღებობის, პოზიციური შეცდომებისა და ფიზიკური მომზადების ბრალია – ეს აღნიშნა ვილი სანიოლმაც მატჩის მერე მედიასთან საუბარშიც.
შემდეგი შეხვედრა ვილი სანიოლის შეგირდებს 19 ნოემბერს, ესპანეთის ქალაქ ვალიოდოლიდში ადგილობრივი ნაკრების წინააღმდეგ ელის:
ესპანეთი V საქართველო – 19 ნოემბერი, 23:45.
ვიცით, რომ საკვალიფიკაციო ეტაპის და წლის უკანასკნელ შეხვედრას სატურნირო თვალსაზრისით არანაირი მნიშვნელობა არ აქვს, თუმცა გვახსოვს პირველი და კოშმარული შეხვედრა ესპანეთთან თბილისში და ჩვენ ჩვენი ანგარიშები გვაქვს გასასწორებელი. სასიცოცხლოდ გვჭირდება პოზიტიური და ღირსეული თამაში – აუცილებლად უნდა დავამტკიცოთ, რომ თბილისური შეხვედრა სრულიად ამოვარდნილი და რეალობისგან დაშორებული იყო, რომ ეს იყო ტოტალური უიღბლობა და მეტოქის გამართლება – ეს თქვა კვარამ გუშინდელი შეხვედრის შემდეგ, დღეს კი ნაკრები უკვე გაემგზავრა პირენეის ნახევარკუნძულზე.
წლის ბოლო მატჩიც უნდა აღვიქვათ მოსამზადებელ ეტაპად ერთა ლიგის ნახევარფინალის წინ. დავხუროთ წელი პოზიტიურ ნოტზე, გავიჯახუნოთ ევროპის საკვალიფიკაციო ეტაპის კარი, ოღონდ დროებით და დავბრუნდეთ ახალი ენერგიით, ახალი შემართებით, უფრო გამოცდილები და უფრო გაზრდილები. ყველაფერი წინაა.
ავტორი: გიორგი ყორღანაშვილი