საქართველოს ბანკი საქართველოს ოლიმპიური ნაკრების მთავარი სპონსორია და არა მარტო – ყოველთვის და ყველგან მხარს უჭერს ადამიანებს, რომლებიც არ ჩერდებიან და საკუთარი წარმატებით უკეთეს საქართველოს ქმნიან.
27 ივლისს საფრანგეთის დედაქალაქ პარიზში ზაფხულის ოლიმპიური თამაშები აიღებს სტარტს. სიმბოლურია, რომ ქართველი ჯუდოკებიდან პირველი 21 წლის გიორგი სარდალაშვილი იასპარეზებს. ახალგაზრდა ქართველი მოქმედი მსოფლიო ჩემპიონი Paris 24-ზე 60 კილოგრამ წონით კატეგორიაში 27 ივლისს გამოვა.
გიორგიმ მაისში აბუდაბიში გამართულ მსოფლიო პირველობაზე მოახერხა ოქროს მედლის მოპოვება და ოლიმპიური თამაშების წინ თავის წონით კატეგორიაში ოლიმპიური ოქროს ერთ-ერთ მთავარ ფავორიტადაც ითვლება.
„ბავშვობაში, როცა მქონდა რთული პერიოდი, იმ დროს დავისახე მიზანი, რომ გავმხდარიყავი ოლიმპიური ჩემპიონი. მე არ მაქვს ოცნებები, მე მაქვს მიზნები. რისი მიღწევაც შემიძლია, მას ვერ დავარქმევ ოცნებას.”
ალბათ, ესაა ფავორიტის საუკეთესო მენტალური მდგომარეობა უმნიშვნელოვანესი ტურნირის წინ, როცა სწორ და პროფესიონალურ განწყობას ზურგს უმაგრებს კარგი სპორტული ფორმა, დიდი შრომა და, რაც მთავარია, ჯანსაღი მიზანდასახულობა.
„სავარჯიშოდ რუსთავიდან დავდიოდი ყოველდღიურად, ამიტომ მწვრთნელები მტოვებდნენ ბაზაზე სასტუმროში, რადგან უფრო მეტი მევარჯიშა. მათ ძალიან დიდი წვლილი მიუძღვით ჩემს წარმატებაში და მადლიერი ვარ მათი. იქ, ზევით, დერეფანში დიდი ჩემპიონების ფორმებია გვარებით – მსოფლიო ჩემპიონების, ოლიმპიური ჩემპიონების და ერთი ჩარჩო ყოველთვის ცარიელია მომავალი ჩემპიონისთვის.”
ქართული ჯუდოს უდიდესი ტრადიცია, ევროპის, მსოფლიოს და ოლიმპიური ჩემპიონების ვრცელი ჩამონათვალი, სწორი მენეჯმენტი, სავარჯიშო გარემო და საერთო ატმოსფერო ბადებს ისეთ სპორტსმენებსა და ჩემპიონებს, როგორიც გიორგი სარდალაშვილია. იმის გააზრება, რომ 21 წლის ასაკში უკვე ამ დიდი ტრადიციის ორგანული და მნიშვნელოვანი ნაწილი ხარ, რთული და საპასუხისმგებლო გარემოებაა, რომელიც თან საკუთარ შესაძლებლობებს გააზრებინებს და თან გთრგუნავს.
დიდი წარსული და ამ წარსულის ინერცია ქმნის აწმყოსაც და მომავალს, სხვა დანარჩენი უკვე ინდივიდუალური ამბებია და თავიდან ბოლომდე კონკრეტულ სპორტსმენებზეა დამოკიდებული, მათ შრომისა და აზროვნების ეთიკაზე. უკვე თამამად შეგვიძლია იმის თქმა, რომ გიორგიმ ეს მძიმე გარემოება საუკეთესოდ გადალახა და თავად იქცა იმ სამაგალითო ძალის მქონე სპორტსმენად, რომელმაც სხვა ახალგაზრდა ადამიანებს უნდა მისცეს ძალა და მოტივაცია.
„ოლიმპიადა სხვა პასუხისმგებლობაა ქვეყანასთან, ოჯახთან, მწვრთნელებთან, ჩემს თავთან. მაგრამ არ ვღელავ, ვიცი, რომ ყველაფერი მაქვს გაკეთებული იმისთვის, რომ გავიმარჯვო.”
2021 წელს გიორგი ახალგაზრდებს შორისაც გახდა მსოფლიო ჩემპიონი. ის ასევე რამდენიმე გრანდ სლემისა და გრანპრის ტურნირების გამარჯვებული და პრიზიორია. რაც აუცილებლად სათქმელია, მან გასულ წელსაც იასპარეზა მსოფლიო ჩემპიონატზე და პირველი მნიშვნელოვანი წარმატებაც მოიპოვა ბრინჯაოს მედლის სახით. მიუხედავად ასაკისა, საკმაო პირადი გამოცდილება დააგროვა და წინაა მთავარი სპორტული ღონისძიებაც.
ვიმედოვნოთ, რომ ოლიმპიური თამაშების მერე იქ, ზევით, დერეფანში, სადაც დიდი ჩემპიონების ფორმებია გვარებით, ახალი ჩარჩო და ჩარჩოები დაემატება, რომ გავიხაროთ აწმყოთი და დარწმუნებულები ვიყოთ, რომ ქართულ ჯუდოს აქვს უფრო მაგარი მომავალი.
„სულ რომ ვუყურებ მაგ ცარიელ ჩარჩოს, მოტივაციას მაძლევს. თუ დღეს ვერ მივაღწიე წარმატებას, ვიცი, რომ ხვალ გამომივა, რადგან ეს არის ჩემი ხასიათი და არ ვაპირებ გაჩერებას.”