4 ივლისს აქსის თაუერსში საქართველოს ბანკის მხარდაჭერითა და HT Solutions-ის ორგანიზებით ჩატარდა ყველაზე მასშტაბური ტექნოლოგიური კონფერენცია, Change Inspire. წლევანდელი კონფერენციის თემა იყო ხელოვნური ინტელექტი – AI ჩემპიონთა ლიგა. საინტერესო დისკუსიებთან, პრეზენტაციებთან ერთად, სტუმრებს სხვადასხვა აქტივობებში ჩართვა და პრიზების მოგებაც შეეძლოთ.
ხელოვნური ინტელექტი თანამედროვეობის უდიდესი მიღწევაა, რომელიც სრულიად ცვლის ორგანიზაციების ყოველდღიურ საქმიანობას, ბევრ გამოწვევასთან ერთად ქმნის უსაზღვრო შესაძლებლობებს.
კონფერენციაზე წარმატებულ ქართველ ბიზნეს წარმომადგენლებთან, ინჟინრებთან, ანალიტიკოსებთან ერთად საკუთარი გამოცდილება და პრაქტიკა გაგვიზიარეს გლობალურ ბაზარზე წარმატებულმა კომპანიებმა, როგორებიც არიან: Lenovo, Amazon, Oracle.
Lenovo-ს დიჯიტალ ტრანსფორმაცია და AI გამოყენება
Lenovo-სა და ხელოვნური ინტელექტის კავშირზე ისაუბრა, გიორგი კაპანაძემ, კორპარაციული გაყიდვების ხელმძღვანელმა. Lenovo ერთ-ერთი წამყვანი გლობალური ტექნოლოგიური კომპანიაა, რომელიც 1984 წელს დაარსდა ჩინეთში. კომპანიის ამბავი პატარა ინიციატივით დაიწყო, 2005 წელს კი მოხდა გადამწყვეტი ცვლილება – Lenovo-მ შეიძინა IBM-ის ლეგენდარული ThinkPad სერია, რითაც გლობალურ ტექნოლოგიურ ბაზარზე მნიშვნელოვანი ადგილი დაიმკვიდრა. ThinkPad ლეპტოპები იმდენად გამძლე და სანდო აღმოჩნდა, რომ NASA-ს კოსმოსურ მისიებშიც გამოიყენეს.
Lenovo – ს შექმნილი პროდუქტები, სმარტფონები, ჭკვიანი სათვალეები და Edge კომპიუტერული სისტემები, იყენებენ ხელოვნურ ინტელექტს. ლეპტოპები აღჭურვილია AI ფუნქციით, რომელიც ავტომატურად არეგულირებს ეკრანის ნათებას, აქრობს გარე ხმაურს ვიდეოზარებისას და სწავლობს მომხმარებლის ჩვევებს ელემენტის ეფექტური გამოყენებისთვის.
მნიშვნელოვანი მიღწევაა Lenovo-ს მიერ შემუშავებული წყლის გაგრილების სისტემა მონაცემთა ცენტრებისთვის. ტრადიციული ვენტილატორების ნაცვლად, ეს სისტემა სითხეს იყენებს სერვერების გასაცივებლად, რაც მნიშვნელოვნად ამცირებს ენერგიის მოხმარებას და ტექნიკის გადახურების რისკს. გარკვეულ მონაცემთა ცენტრებში ამ სისტემამ იმდენად ეფექტურად იმუშავა, რომ წლიურად 30% -ით მეტი ენერგიის დაზოგვა მოახერხეს. ინოვაცია განსაკუთრებით მნიშვნელოვანია მაღალი დატვირთვის მქონე AI პროცესებისთვის. Lenovo ასევე იყენებს AI-ს ტექნიკას პროგნოზირებისთვის (Predictive Maintenance), რაც ნიშნავს, რომ მოწყობილობები თვითონვე გრძნობენ შესაძლო დაზიანებას და დროულად გვაფრთხილებენ რისკების შესახებ. კომპანია ავითარებს უსაფრთხოების პლატფორმას ThinkShield, რომელიც ხელოვნური ინტელექტის მეშვეობით იცავს მომხმარებელს კიბერსაფრთხეებისგან.
Lenovo ტექნოლოგიას მხოლოდ კომერციული მიზნებით არ ქმნის – მისი სტრატეგიაა შექმნას ჭკვიანი პროდუქტი, რომელიც ამასთანავე იქნება ეკოლოგიური, უსაფრთხო და რეალურად მორგებული მომხმარებლის ყოველდღიურ საჭიროებებზე.
როგორ იყენებენ AMAZON-ში AI-ს ყოველდღიურობაში
ალექსანდრე ბერნადსკიმ და ინა ოზოგინამ ისაუბრებს, როგორ იყენებს Amazon GenAI-ს შიდა პროცესების ავტომატიზაციისთვის. ამაზონი ხელოვნურ ინტელექტს აქტიურად იყენებს როგორც მომხმარებლებისთვის, ასევე შიდა ოპერაციების გასაუმჯობესებლად. კომპანიის თანამედროვე ინოვაციური პროექტია Rufus – ჭკვიანი შოპინგ ასისტენტი, რომელიც პასუხობს მომხმარებლის კითხვებს, აძლევს რეკომენდაციებს, ეხმარება გადაწყვეტილებების მიღებაში, წამებში ამუშავებს ტექსტსა და სურათებს, . AI გამოიყენება ფარმაცევტულ კონსულტაციებშიც, რეკლამის ავტოგენერირებაში, პროდუქტის ვიზუალიზაციაში, მომხმარებელს შეუძლია ვიზუალურად ნახოს როგორ მოერგება კონკრეტული ფეხსაცმელი, სათვალე, ან მოუხდება თუ არადა მაცივარი სამზარეულოს. ასეთ სიმულაციებს მინიმუმადე დაჰყავს ონლაინ შოპინგის დისკომფორტები და ქმნის რეალურ გამოცდილებას.
გარდა ონლაინ შოპინგის პლატფორმისა, ამაზონს აქვს “ღრუბლოვანი სერვისების პლატფორმა” – Amazon Web Services (AWS), რომელიც მსოფლიოს მილიონობით კომპანიას საშუალებას აძლევს შეინახონ, დაამუშაონ და გაანალიზონ მონაცემები ინტერნეტის მეშვეობით – ფიზიკური სერვერების გარეშე. კომპანიებს, რომლებსაც არ ჰყავთ მონაცემთა მეცნიერები, AWS სთავაზობს Bedrock-ის პლატფორმას, სადაც ხელმისაწვდომია წინასწარ გაწვრთნილი AI მოდელები ( Amazon Titan/Nova, Anthropic Claude და სხვები), ინტეგრირებული უსაფრთხოებითა და მოქნილობით. ასევე AWS კომპანიებს სთავაზობს AI ასისტენტებს: Q for Business — შიდა კორპორაციული ინფორმაციის ანალიზისთვის და Q Developer — კოდის გენერაციისა და აპლიკაციების ავტომატური შექმნისთვის.
Oracle-ის და AI-ს სინთეზი
Oracle მსოფლიო ლიდერია ტექნოლოგიებში. Oracle Cloud ინფრასტრუქტურა – მაღალეფექტიან და უსაფრთხო ღრუბლოვან პლატფორმა – ხელოვნური ინტელექტის დახმარებით დიდი მონაცემების რეალურ დროში ანალიზის საშუალებას იძლევა.
კონფერენციაზე კომპანია წარადგინა იან სკასირსკიმ, ორაკლის მთავარმა ქლაუდ ინჟინერმა, რომელმაც სპორტის მაგალითით აუხსნა აუდიტორიას კომპანიის შესაძლებლობები.
Oracle-ის სისტემები ემსახურება ისეთ დიდ სპორტულ ორგანიზაციებს, როგორებიცაა ინგლისის ფეხბურთის ლიგა, NBA, Red Bull. AI ტექნოლოგია აანალიზებს თამაშს სხვადასხვა რაკურსით. ტრენერებს შეუძლიათ, განსაზღვრონ მოთამაშეთა შესრულების დონე, პასების ან გოლების ეფექტურობა, ტაქტიკური შეცდომები და სხვა მნიშვნელოვანი მონაცემები. Oracle-ის კლიენტები ასევე არიან მრავალფეროვანი ორგანიზაციები სხვადასხვა სფეროდან – მსხვილი და საშუალო კომპანიები, სახელმწიფო უწყებები, ჯანდაცვის, ფინანსების, ტექნოლოგიების, განათლების წარმომადგენლები. Oracle-ის მთავარი მიზანი AI-ს დემოკრატიზაციაა, კომპანიის ხედვით, საყოველთაო კეთილდღეობისთვის ხელოვნური ინტელექტი მხოლოდ ტექნოლოგიური ექსპერტებისთვის კი არა, ყველა ტიპის ბიზნესისთვის ხელმისაწვდომი და მარტივად გამოსაყენებელი უნდა გახდეს.
კონფერენციაზე ექსპერტებმა განიხილეს სხვა მნიშვნელოვანი საკითხებიც. უპასუხეს მთავარ კითხვასაც, ჩაანაცვლებს თუ არა ხელოვნური ინტელექტი ადამიანს? ერთ ერთმა სპიკერმა ჯენსენ ჰუანგის ცნობილი სიტყვები გაიმეორა:
“ხელოვნური ინტელექტი არ ჩაანაცვლებს ადამიანს, ადამიანს ჩაანაცვლებს ის, ვინც იცის, როგორ გამოიყენოს ხელოვნური ინტელექტი”.
თანამედროვე გლობალურ ბაზარზე ყველა წარმატებული კომპანიის უკან დგას ინოვაციებითა და ენთუზიაზმით სავსე გუნდი, რომელიც ითვისებს, ავითარებს ხელოვნურ ინტელექტს და იყენებს მის უსაზღვრო შესაძლებლობებს სერვისების სწრაფი განვითარებისთვის. საქართველოს ბანკმა 10 წელზე მეტია დაიწყო AI ადაპტაცია, წელს კი ყველაზე პრესტიჟულმა ორგანიზაციამ Global Finance ცენტრალურ და აღმოსავლეთ ევროპაში საუკეთესო სამომხმარებლო და კორპორატიულ ბანკად დაასახელა AI მიმართულებით.
საქართველოს ბანკისთვის პრიორიტეტულია AI ინოვაციების მხარდაჭერა, რაც ტექნოლოგიურ პროგრესს შეუწყობს ხელს. კომპანია მომავალშიც განაგრძობს საერთაშორისო პრაქტიკების დანერგვას, ღირებული, საინტერესო იდეების აღმოჩენასა და მხარდაჭერას.