ყოველ წელს, გაზაფხულის მიწურულს, როდესაც ბოლო ზარის პერიოდი დგება, ყველა ჩვენგანს, რამდენი წლის წინაც არ უნდა გვქონდეს სკოლა დამთავრებული, თავიდან გვიცოცხლდება მოგონებები – ყველას გვაქვს რაღაც მოსაყოლი და გასახსენებელი ბოლო ზარზე. სკოლის დამთავრებას და ახალი სტუდენტური ცხოვრების დაწყებას, თავდაპირველად, რა თქმა უნდა, სიხარული მოაქვს, თუმცა დროის გასვლასთან ერთად, ამ სიხარულს თან ნოსტალგიაც ემატება – გადააზრება და გახსენება ჩვენი უწინდელი თავის, ზოგჯერ სინანული, ხშირად კი უბრალოდ ძველი დროის და მეგობრების მონატრება.
დღევანდელ ბლოგში ბოლო ზარს და სტუდენტური ცხოვრების პირველ შთაბეჭდილებებს ახალგაზრდა მსახიობი – ბუკა თოლორდავა იხსენებს.
როგორ შეცვალა სკოლასთან დამშვიდობებამ შენი ხედვა მომავალზე?
,, სკოლის წლებშივე მკაფიო ხედვა მქონდა, საით მინდოდა წასულიყო ჩემი ცხოვრება და რა მიმართულებით, რამდენად გამომდის ეს მეორე საკითხია, მაგრამ ეს ხედვა არ შეცვლილა დღემდე. ის, რაც ნამდვილად შეცვალა სკოლის დასრულებამ, არის სამყაროს აღქმა. თითქოს, ჩემი “ბაბლიდან” გამოვედი და მივიღე ცხოვრება ისეთი, როგორიც არის, ზედმეტი შელამაზებების გარეშე”
რა იყო შენთვის ყველაზე რთული სკოლის დამთავრებისას და როგორ გაუმკლავდი?
,,ალბათ, ახალი გარემო, ახალი წრე, ახალი ცხოვრების წესი… თეატრალურ უნივერსიტეტში სწავლა მარტივი არ არის, აქ ყოველდღიურად 12 საათს ატარებ და რამდენად გაცვეთილადაც არ უნდა ჟღერდეს, ეს ხდება შენი “სახლი” და იქ შეძენილი მეგობრები ხდებიან შენი ოჯახი. ეს დიდი ცვლილებაა, რომელთან ადაპტირებაც მარტივი არ არის, მაგრამ ჩემი აზრით, ბუკა ამ ცვლილების შემდეგ უფრო საინტერესო ადამიანად იქცა 🙂”
როგორ აირჩიე პროფესია და შენი აზრით როგორ უნდა აირჩიოს მომავალმა სტუდენტმა მისთვის სწორი პროფესია?
,,ისეთი განცდა მაქვს, თითქოს მე თავად ამირჩია ჩემმა პროფესიამ. თავდაპირველად ეს ბავშვური გატაცება იყო, რომელიც არსაიდან, ძალიან სპონტანური გადაწყვეტილების საფუძველზე გაჩნდა ჩემს ცხოვრებაში, თანდათან დიდ ინტერესში გადაიზარდა და ახლა ვგრძნობ, რომ ერთადერთი რამაა, რაც არასდროს მომბეზრდება. ალბათ, სწორედ ეს არის ყველაზე მნიშვნელოვანი, როცა პროფესიას ირჩევ: განსაზღვრო რა არის ის, რისი კეთებაც შენი ცხოვრების უდიდესი ნაწილი არასდროს მოგბეზრდება.”
შენი აზრით რას ნიშნავს იყო სტუდენტი?
,,სტუდენტობა გარდამავალი პერიოდია ბავშვობასა და ზრდასრულობას შორის. ვფიქრობ, ეს არის საკუთარი თავის შეცნობის კულმინაციური ფაზა. რა თქმა უნდა, ადამიანი მერეც შეიძლება შეიცვალოს, თუმცა არამგონია ფუნდამენტური ცვლილებები შესაძლებელი იყოს. ასე რომ, სტუდენტობა არის ეტაპი, როცა ეცნობი საკუთარ თავს, მიიღებ (ან არ მიიღებ) და საბოლოოდ ჩამოყალიბდები ისეთად, როგორიც ცხოვრების ბოლომდე იქნები. (არ გამოვრიცხავ, ჩემი აღქმა მეტად ახალგაზდული იყოს 🙂)”
შენს ბოლო ზარზე დაბრუნების შესაძლებლობა რომ გქონდეს, რას ეტყოდი საკუთარ თავს?
,,ალბათ, ვეტყოდი: “ბუკა, დღეიდან ბევრი რამ შეიცვლება, მაგრამ ამ ცვლილებებმა არ დაგავიწყოს, ვინ ხარ.” 🙂”
სტუდენტური ბარათის უპირატესობები
ახალი ცხოვრების დაწყებასთან ერთად, იცვლება შენი ხარჯები და პრიორიტეტებიც. საქართველოს ბანკის სტყუდენტური ბარათი ზუსტადაა მორგებული სტუდენტების საჭიროებებს – ადვილად დაზოგავ ფულს სხვადასხვა მიზნებისთვის, ასევე შეძლებ სატრანსპორტო შეღავათის და სხვადასხვა ფასდაკლებებისა თუ შეთავაზებების გამოყენებას. მნიშვნელოვანი უპირატესობაა ისიც, რომ ბარათის დიზაინის არჩევას შენი ინტერესებიდან გამომდინარე შეძლებ. ბარათის შესახებ დეტალური ინფომრაცია შეგიძლია საქართველოს ბანკის ვებ-გვერდზე იხილო.