ატლანტის ოკეანეში მდებარე პატარა კუნძულოვანი სახელმწიფო – ისლანდია – ჯადოსნურ ქვეყანას ჰგავს, რომელსაც ურბანული პეიზაჟებით დაღლილი თანამედროვე ადამიანი მხოლოდ ზღაპრებში ან ფილმებში თუ იპოვის. ყინულის გამოქვაბულები, გეიზერები, შავი ქვიშის სანაპიროები, ლავის მინდვრები, ჩრდილოეთის ნათება, დაუსრულებელი დღეები და ღამეები – მიუწვდომლობის განცდას ქმნის, თითქოს ეს მისტიკური მშვენიერება სხვა პლანეტას ეკუთვნის, სადაც ვერასდროს ვიმოგზაურებთ.
თუმცა ისლანდიაში მოგზაურობა რთული სულაც არ არის, SOLO – ს მხარდაჭერით ქართველი მოგზაურები გიორგი შაკაია (შაკა) და სერგი ტკაჩუკი იმყოფებოდნენ ისლანდიის 10-დღიან ექსპედიციაში. ზღაპრულ კუნძულზე გატარებული დაუვიწყარი დღეების შესახებ კი თავად მოგიყვებიან:
,,ისლანდიაში თუ ერთხელ მაინც მოხვდი, აუცილებლად მოგინდება, ისევ დაბრუნდე უკან. ეს ქვეყანა გამორჩეულად გვიყვარს, უკვე სამჯერ ვესტუმრეთ. ჩვენი ექსპედიციის მიზანია, რაც შეიძლება მეტმა ადამიანმა გაიცნოს ახლოს ისლანდიის ბუნება, განსაკუთრებული ადამიანები და უნიკალური ისტორია. ეს არ იყო მხოლოდ მოგზაურობა და ღირსშესანიშნაობების დათვალიერების რუტინული პროცესი, უკან საოცარი ემოციებითა და თავგადასავლებით დავბრუნდით”, – სერგი
მარშრუტი და სანახაობები
,,ისლანდიაში წრიული მარშრუტი გავიარეთ, ე.წ Ring Road, რომელიც მთელ ისლანდიას წრეს არტყამს და ყველა ღირსშესანიშნაობას, სოფელს, თუ ნასახლარს გადის. ძირითადად ტურისტები რეიკიავიკში იდებენ ბინას და შემდეგ ერთდღიან ტურებზე გადიან იქვე, ახლომახლოს. ჩვენი ექსპედიციის მიზანი კი მთლიანი კუნძულის შესწავლა იყო, არ გვინდოდა, გამოგვეტოვებინა ბუნების საოცრებები, რომლებიც კუნძულის სხვადასხვა ნაწილშია მიმოფანტული. ექსპედიცია ფარავს თითქმის ყველა პოპულარულ თუ არაპოპულარულ, მაგრამ გასაოცარ დანიშნულებას: ჩანჩქერებს, გეიზერებს, სანაპიროებს, ყინულის გამოქვაბულებს, მიტოვებულ სოფლებს, სადაც ტორფის სახლებსაც შეხვდებით, ვეშაპების ტურს და რაც ყველაზე საინტერესოა, „ნადირობას ჩრდილოეთის ციალზე”. ისლანდიის ყველა პეიზაჟი დაუვიწყარია, მაგრამ ჩრდილოეთის ციალი შეუდარებელია. ფერადი ნათების ნახვა ყოველ ჯერზე პატარა ბავშვივით გვახარებს, ჩვენც და ახალბედა მოგზაურებსაც”. – შაკა
ადგილობრივები
,,ისლანდიელი ხალხი ძალიან გულწრფელია. თუ გიღიმიან გულწრფელად გიღიმიან და გემეგობრებიან, მაგრამ ნამდვილი ისლანდიელის ნახვა არც თუ ისე მარტივია. ისინი იშვიათად გხვდებიან გზად, განსაკუთრებით დაუსახლებელ ადგილებში. ისლანდიელებს უყვართ პასუხისმგებლობიანი ტურისტები, რომლებიც პატივს სცემენ და უფრთხილდებიან ბუნებას. ადგილობრივებისთვის თავისებურად ეგზოტიკური, იდუმალი ქვეყანა ყველაზე დიდი სიმდიდრეა. რამდენადაც ხელუხლებელი და მოვლილია აქ ბუნება, იმდენად განვითარებულია ინფრასტრუქტურაც. სასტუმროებში ძირითადად თვითრეგისტრაციაა, ინტერნეტი ძალიან სწრაფია. ისლანდიის ელექტროენერგიის თითქმის 100% განახლებადი გეოთერმული წყლებიდან მოდის, ყველაზე ცივ ამინდებშიც ყველა შენობა და ზოგჯერ ტროტუარებიც კი თბილია. გზებზე უხვად გხვდებიან უნიკალური სახეობის ისლანდიური ცხენები, ძალიან მეგობრულები არიან, თუ მიუახლოვდი, ახლოს მოდიან და გეფერებიან”. – შაკა
რჩევები
„ისლანდიაში მოგზაურობას თუ გადაწყვეტთ, გაითვალისწინეთ, რომ არ უნდა წახვიდეთ off-road იქ, სადაც არ შეიძლება – ეს ისლანდიაში ძალიან სერიოზული დარღვევაა. თან უნდა გქონდეთ წყალგაუმტარი და თბილი ტანსაცმელი, კომფორტული ფეხსაცმელი ფეხით სიარულისთვის. დასახლებულ პუნქტებს შორის დიდი დაშორების გამო აუცილებელია, ყველა სასტუმრო წინასწარ გქონდეთ დაჯავშნილი. ქალაქებს შორის ავტობუსები გადაადგილდებიან, თუმცა საუკეთესო გამოცდილებისთვის მანქანის ქირაობა სჯობს. ისლანდია მოულოდნელობებით არის სავსე, დაგეგმეთ წინასწარ, მაგრამ იყავით მოქნილი – ამინდმა შესაძლოა გეგმები შეგიცვალოთ. რთული გზებისა და თავგადასავლების არ შეგეშინდეთ – სწორედ თავგადასავლებია ისლანდიაში მოგზაურობის მაგიურობა”. – სერგი
თუ განსხვავებულ გამოცდილებას ეძებთ და გსურთ იმოგზაუროთ ვულკანებისა და გეიზერების ზღაპრულ ქვეყანაში, SOLO დაგეხმარებათ, აღმოაჩინოთ ნამდვილი ისლანდია. სპეციალური მარშრუტების, შეზღუდვებისა და მკაცრი კლიმატის გამო, ისლანდიაში გამოცდილ გიდებთან ერთად მოგზაურობა საუკეთესო გადაწყვეტილებაა.
ჟურნალის Voyager by SOLO – ს ბოლო გამოცემაც სწორედ ისლანდიის შესახებაა. ჟურნალში იპოვით უამრავ საინტერესო ფაქტს და ამბავს ისლანდიური კულტურის, ტრადიციების, რწმენების, ხელოვნებისა და საოცარი ბუნებრივი მოვლენების შესახებ.