ლიდერატორის პროგრამა ბრუნდება! სტუდენტების კარიერული განვითარების ყველაზე მასშტაბური პროექტი, რომელსაც საქართველოს ბანკი 2017 წლიდან ახორციელებს, ნიჭიერი ახალგაზრდა პროფესიონალების ძიებას იწყებს და მომავალ ლიდერატორებს საუკეთესო გამოცდილების დაგროვებას ჰპირდება.
რიგით მე-9 ლიდერატორი 12 პროგრამას მოიცავს. პროექტში ჩართვა შეუძლიათ საბაკალავრო საფეხურის მე-3 და მე-4 კურსის სტუდენტებს, ასევე ახალ კურსდამთავრებულებს. შერჩეულ კანდიდატებს ექნებათ უნიკალური შესაძლებლობა, შეიძინონ თეორიული და პრაქტიკული ცოდნა, აუცილებელი უნარ-ჩვევები, გაიარონ ტრენინგები დარგის საუკეთესო სპეციალისტებთან და იმუშაონ მათთვის საინტერესო პროექტებზე მენტორთან ერთად. ეს ყველაფერი სწავლასთანაც შეთავსებადია. რაც მთავარია, ლიდერატორის შეუცვლელი პრინციპი როტაციული წესით დასაქმებაა, ეს კი პროექტის მონაწილეებს საშუალებას აძლევს, სასურველი პროგრამის სხვადასხვა მიმართულებით მოსინჯონ საკუთარი ძალები.
ამ ყველაფერთან ერთად კი, ლიდერატორი სამომავლოდაც გეხმარება პროფესიულ წინსვლაში — 2017-2024 წლებში პროგრამამ 445 საუკეთესო სტუდენტი მიიღო, პროგრამის დასრულების შემდეგ, მონაწილეთა 78%-მა კარიერა საქართველოს ბანკშივე, ქვეყნის წამყვან ფინანსურ და ტექნოლოგიურ კორპორაციაში, გააგრძელა.
მომავალი ლიდერატორების ძიება უკვე დაიწყო — სასურველი პროგრამების ნახვა და რეგისტრაციის გავლა ვებგვერდზე შეგიძლია! მანამდე კი ბლოგში გაეცნობი, რომელ პროგრამებს გთავაზობს ლიდერატორი — ამჯერად, პორტფელური და საოპერაციო რისკების მიმართულებით.
პორტფელური რისკების ანალიტიკა და რეპორტინგი
გაინტერესებს რეპორტინგი და საკრედიტო პორტფელის მართვა? მაშინ საშენო სწორედ ეს პროგრამა ყოფილა. აქ ბიზნესპორტფელის სტატისტიკურ ანალიზს, რისკების მონიტორინგს, რეპორტინგის წარმოებასა და სხვა ბევრ პროცედურას დაეუფლები. პროგრამას ორი ქვემიმართულება აქვს, ასე რომ, როტაციული პრინციპით 8 თვეს სამ სხვადასხვა დეპარტამენტში თანაბრად დაყოფ, რაც ამავდროულად სატრენინგო პერიოდსაც მოიცავს.
პირველი მიმართულება CB პორტფელური რისკებია, სადაც კორპორაციული კლიენტების პორტფელების მართვაზე იმუშავებ და ამ პროცესს უფრო სიღრმისეულად გაიცნობ, გაიგებ მეტს ბიუჯეტირებაზე, სტრეს ტესტებზე, გადახდების ანალიზზე და სხვა. ამასთან, ჩაერთვები პორტფელის ხარისხის შეფასებასა და გაუმჯობესებაში.
აი, მეორე მიმართულება კი SME პორტფელურ რისკებს მოიცავს და მიკრო, მცირე და საშუალო ბიზნესების საკრედიტო პორტფელებზე მუშაობას გულისხმობს. საბოლოო ჯამში, პროგრამის დასრულების შემდეგ უამრავ აუცილებელ უნარ-ჩვევას შეიძენ, მათ შორის, ისწავლი მონაცემების დამუშავებას, ანალიტიკასა და ვიზუალიზაციას, ჩაერთვები რეპორტინგის წარმოებაში და პრეზენტირების უნარებსაც დახვეწავ, გეცოდინება რისკების იდენტიფიცირება და მართვაც.
ეს პროგრამა მესამე, SME რეპორტინგისა და ანალიტიკის მიმართულებასაც მოიცავს, რომელიც ლიდერატორს მისცემს საშუალებას, რომ მცირე და საშუალო ბიზნესის სეგმენტთან დაკავშირებული ანალიტიკა და რეპორტინგი აწარმოოს.
საოპერაციო რისკები და აუდიტი
თუ უფრო გლობალური ხედვა და კომპანიის შიდა მექანიზმები გაინტერესებს, ეს პროგრამა შენთვის იდეალურია. აქ გაეცნობი საოპერაციო რისკების მართვის პრინციპებს და პრაქტიკაში განიმტკიცებ მიღებულ ცოდნას: უნიკალური შესაძლებლობა გექნება, ორგანიზაციის შიდა კონტროლის მექანიზმები საქართველოს ბანკის მაგალითზე გაიცნო.
ეს პროგრამაც ორ ქვემიმართულებას მოიცავს. პირველი საოპერაციო რისკების მართვაა. აქ საოპერაციო რისკების შეფასების მიზნით საბანკო პროდუქტების, ბიზნეს პროცესებისა და სისტემების ანალიზი მოგიწევს. რაც მთავარია, ჩაერთვები ახალი პროდუქტის შემუშავების პროცესშიც, რაც რისკების გამოვლენასა და მათ მინიმიზაციაში დაგაოსტატებს.
შემდგომ ეტაპზე კი ოპერაციების აუდიტში გადაინაცვლებ, რომელიც ბანკის დიდ ორგანიზაციულ სტრუქტურას სულ სხვა თვალით დაგანახებს და მისი ეფექტური ფუნქციონირებისთვის საჭირო პროცედურებში სიღრმისეულად გაგარკვევს. აქ შენ აუდიტის ფარგლებში დაგეგმვის, ტესტირებისა და რეპორტინგის პროცესში აქტიურად ჩაერთვები.
ამდენად, პროგრამის დასასრულს, რისკების მართვისა და აუდიტის მიმართულებით, თეორიულ ცოდნასთან ერთად, პრაქტიკაში მიღებული დიდი გამოცდილებაც გექნება შეძენილი; განივითარებ ანალიზისა და კრიტიკული აზროვნების, დეტალებზე ორიენტირებისა და ეფექტური კომუნიკაციის უნარებს.
_____________
რა თქმა უნდა, ეს ყველაფერი არ არის. ლიდერატორის დანარჩენი მიმართულებების პროგრამებზე ვრცლად სხვა ბლოგებში მოგიყვებით. შენ კი მეტის გასაგებად აუცილებლად ეწვიე ვებგვერდს, გაგზავნე განაცხადი მაქსიმუმ სამ პროგრამაზე და გახდი ლიდერატორი!