სტუდენტებისთვის პროფესიული განვითარების უნიკალური შესაძლებლობა – ლიდერატორის პროგრამა იწყება! საქართველოს ბანკის პროექტი, რომელიც 2017 წლიდან ხორციელდება, კვლავ გააერთიანებს ნიჭიერ ახალგაზრდა პროფესიონალებს, რომლებიც ლიდერატორის ფარგლებში საუკეთესო გამოცდილებას მიიღებენ.
რიგით მე-9 ლიდერატორი 12 პროგრამას მოიცავს. პროექტში ჩართვა შეუძლიათ საბაკალავრო საფეხურის მე-3 და მე-4 კურსის სტუდენტებს და ახალ კურსდამთავრებულებს. შერჩეულ კანდიდატებს ექნებათ უნიკალური შესაძლებლობა, შეიძინონ თეორიული და პრაქტიკული ცოდნა, აუცილებელი უნარ-ჩვევები, გაიარონ ტრენინგები დარგის საუკეთესო სპეციალისტებთან და იმუშაონ მათთვის საინტერესო პროექტებზე მენტორთან ერთად. ეს ყველაფერი სწავლასთანაც შეთავსებადია. რაც მთავარია, ლიდერატორის შეუცვლელი პრინციპი როტაციული წესით დასაქმებაა, ეს კი პროექტის მონაწილეებს საშუალებას აძლევს, სასურველი პროგრამის სხვადასხვა მიმართულებით მოსინჯონ საკუთარი ძალები.
ამ ყველაფერთან ერთად კი, ლიდერატორი სამომავლოდაც გეხმარება პროფესიულ წინსვლაში — 2017-2024 წლებში პროგრამამ 445 საუკეთესო სტუდენტი მიიღო, პროგრამის დასრულების შემდეგ, მონაწილეთა 78%-მა კარიერა საქართველოს ბანკშივე, ქვეყნის წამყვან ფინანსურ და ტექნოლოგიურ კორპორაციაში, გააგრძელა.
მომავალი ლიდერატორების ძიება კი უკვე დაიწყო — სასურველი პროგრამების ნახვა და რეგისტრაციის გავლა ვებგვერდზე შეგიძლია! მანამდე ბლოგში გაეცნობი, რომელ პროგრამებს გთავაზობს ლიდერატორი — ამჯერად, ბიზნესის განვითარებისა და HR-ის მიმართულებით.
ბიზნესის განვითარება
თუკი ახალი პროდუქტებისა და სერვისების შექმნა, ბაზრის კვლევა, პროცესების ანალიზი და ოპტიმიზაცია, ეფექტიანობის გაუმჯობესება და ინოვაციური პროექტების განვითარება გაინტერესებს, ბიზნესის განვითარების პროგრამაზე განაცხადი უნდა გამოგზავნო! რვა თვის განმავლობაში პროგრამა საშუალებას მოგცემს, ორ სხვადასხვა მიმართულებაში თანაბარი დრო დაყო: CB ბიზნეს დეველოპმენტი და SME პროდუქტ დეველოპმენტი.
CB ბიზნეს დეველოპმენტის მიმართულებაში გაიგებ მეტს კორპორაციული საბანკო მომსახურების შესახებ, შეისწავლი ბიზნესმიმართულებით არსებულ პროდუქტებს და მათ განვითარებაშიც ჩაერთვები. რაც შეეხება SME პროდუქტ დეველოპმენტს, ეს დეპარტამენტი მცირე და საშუალო ბიზნეს კლიენტებს ემსახურება და მათთვის ქმნის ახალ პროდუქტებსა და სერვისებს. ამ პროცესში მონაწილეობას მიიღებ შენც, ისწავლი ბაზრის კვლევას, ანალიზსა და შეიძენ საჭირო უნარებს.
საბოლოო ჯამში, ბიზნესის განვითარების პროგრამა არაერთ აუცილებელ უნარ-ჩვევას შეგძენს, მათ შორისაა ანალიზი და კრიტიკული აზროვნება, ეფექტური კომუნიკაცია და ურთიერთობების მართვა, გუნდური მუშაობა, ცვალებად გარემოსთან ადაპტაცია და სხვა.
მომხმარებელთა გამოცდილებისა და ლოიალურობის პროგრამების მართვა
ბიზნესის განვითარებისგან განსხვავებით, ამ პროგრამას სამი ქვემიმართულება აქვს და შენც სამ სხვადასხვა დეპარტამენტში აღმოჩნდები. ალბათ გაინტერესებს, როგორ იქმნება და იხვეწება ის საბანკო პროდუქტები, რომელთა აქტიური მომხმარებელი სავარაუდოდ თავადაც ხარ.
პროგრამაში მონაწილე ერთ-ერთი დეპარტამენტი მომხმარებელთა გამოცდილებაზე ზრუნავს. ამ მიზნით, გუნდის წევრები იკვლევენ მომხმარებლის საჭიროებებს, სერვის-პროდუქტებით კმაყოფილებას და ამ ყველაფრის შედეგად სიახლეების დანერგვაზე მუშაობენ. ლიდერატორიც ამ პროცესის აქტიური მონაწილე იქნება: კვლევა, ანალიზი, მონაცემების დამუშავება და რეპორტინგი.
შემდეგია ლოიალურობის პროგრამის მართვის დეპარტამენტი, რომელიც, სახელიდანაც მიხვდები, ლოიალურობის პროგრამების სტრატეგიებზე მუშაობს. ასე რომ, აქ მეტს შეიტყობ PLUS და AmEx ბარათებზე და მათთან დაკავშირებული კამპანიების შიდა სამზარეულოშიც შეიხედავ.
მესამე დეპარტამენტი პრემიალური საცალო საბანკო მიმართულების (SOLO) პარტნიორებთან ურთიერთობის სამსახურია, სადაც შესაძლებლობა გექნება, პარტნიორებთან კომუნიკაციაში ჩაერთო და ბაზრის ტენდენციებზე დაკვირვებითა და ანალიზით მომხმარებლის მოთხოვნებზე მორგებული შეთავაზებები შექმნა.
ამდენად, ეს განყოფილება განსაკუთრებულად დაგეხმარება კომუნიკაციის უნარ-ჩვევების განვითარებაში. ამასთან, დაეუფლები მოლაპარაკებების წარმოების ხელოვნებას, ისწავლი რეპორტინგს, პროექტების მართვას, ბაზრის და კონკურენციის მონიტორინგს და სხვა.
ტალანტების მოზიდვა და განვითარება
ტალანტების მოზიდვისა და განვითარების პროგრამა მოიცავს სამ მიმართულებას და განკუთვნილია HR-ის მიმართულებით დაინტერესებული სტუდენტებისთვის. ეს პროგრამა გაძლევს უნიკალურ შესაძლებლობას, აღმოაჩინო, როგორ მუშაობს წარმატებული კომპანიის შექმნის პროცესები, გაეცნო ადამიანური კაპიტალის მართვის პრაქტიკებს და საფუძვლიანად შეისწავლო ისეთი თემები, როგორიცაა კანდიდატების მოზიდვა, შერჩევა, სწავლება და მათი განვითარების ხელშეწყობა.
წარმოგიდგენია, როგორი განცდაა, როცა მომავალ ვარსკვლავს აღმოაჩენ? ტალანტების მოზიდვის სამსახურში ჩართული იქნები ორგანიზაციის მასშტაბით სხვადასხვა პოზიციისთვის ტალანტების მოძიებისა და შერჩევის პროცესში. ისწავლი, როგორ შეარჩიო შესაბამისი კანდიდატები, იმუშავებ მონაცემთა ბაზებზე, გაივლი გასაუბრებების ორგანიზების პროცესს და გაძლიერდები კომუნიკაციის უნარებში.
სწავლების მიმართულებაში გაეცნობი თანამშრომლებისთვის სასწავლო პროგრამების შექმნას, გაუმჯობესებასა და ინოვაციური მიდგომების დანერგვას. შენი იდეები და ძალისხმევა სწავლების პროცესის განვითარებაში მნიშვნელოვან როლს შეასრულებს.
ტალანტების მართვის სამსახურში მონაწილეობას მიიღებ თანამშრომლების შეფასებასა და შედეგების ანალიტიკაში, ტალანტების პროფესიულ განვითარებაზე ზრუნვაში, ასევე სტუდენტური და სტაჟირების პროგრამების მართვაში.
პროგრამის დასრულების შემდეგ შენ გექნება HR-ის მიმართულებით არა მხოლოდ თეორიული ცოდნა, არამედ რეალურ პროექტებზე მუშაობის გამოცდილებაც. განივითარებ ანალიტიკურ აზროვნებას, კომუნიკაციის უნარებს და ჩამოყალიბდები პროფესიონალად, რომელიც წარმატებას არამხოლოდ საკუთარი კარიერისთვის, არამედ სხვებისთვისაც ქმნის.
_________________
ცხადია, ეს ყველაფერი არ არის. ლიდერატორის დანარჩენი მიმართულებების პროგრამებზე ვრცლად სხვა ბლოგებში მოგიყვებით. შენ კი მეტის გასაგებად აუცილებლად ეწვიე ვებგვერდს, გაგზავნე განაცხადი მაქსიმუმ სამ პროგრამაზე და გახდი ლიდერატორი!