საქართველოს ბანკი 2020 წლიდან ნიკა გუჯეჯიანის სახელობის სტიპენდიის ფარგლებში ნიჭიერ ახალგაზრდებს მსოფლიოს ერთ-ერთ ყველაზე ცნობილ კრეატიულ სკოლაში – Miami Ad School EU-ში უფასო სწავლის შესაძლებლობას აძლევს.
2023 წელს კონკურსის გამარჯვებული სოფი ივანიშვილი გახდა, ბერლინში გაემგზავრა და ამჟამად Art Direction-ის მიმართულებით სწავლობს. როგორც სოფი ამბობს, მაიამის სკოლის შესახებ მეგობრისგან გაიგო და იქაური თავგადასავლებითა და ამბებით შთაგონებულმა ბევრჯერ შეავსო აპლიკაცია, თუმცა გაგზავნას ვერ ბედავდა 2023 წლის ივნისამდე. როცა ეს ნაბიჯი გადადგა, პირველივე ცდაზე 160 აპლიკანტს აჯობა და ნიკა გუჯეჯიანის სახელობის სტიპენდია მოიპოვა.
მაიამის კრეატიულ სკოლაში სწავლისა და უცხო ქალაქში ცხოვრების გამოცდილებას ახლა სოფი სხვებს უზიარებს ბერლინიდან:
მოლოდინები
,,შემიძლია ვთქვა, რომ ყველა მოლოდინი გამიმართლდა. ვსწავლობ საგნებს, რომლებიც სულ მაინტერესებდა, მაგრამ დროს და სივრცეს ვერ ვპოულობდი, რომ მესწავლა. კურიკულუმი მრავალფეროვანია, 5 საგანს ვსწავლობთ, ხუთივე განსხვავებული და თანამედროვე კრეატიულ ინდუსტრიაში საჭირო საგანია. ბევრ საინტერესო ადამიანთან მიწევს ყოველდღიურად ურთიერთობა და ამ ურთიერთობითაც ბევრს ვსწავლობ. საერთო ინტერესების მქონე ადამიანებთან საუბარი, იდეების მიმოცვლა ზრდისა და განვითარების მნიშვნელოვანი ნაწილია“.
სწავლის პროცესი
,,მაიამის სკოლაში საკმაოდ დატვირთული და ცოცხალი გრაფიკი გვაქვს. ყოველდღე გვაქვს ლექცია და დავალება, ანუ ყოველი ლექციის შემდეგ რაღაც ახალი და შენეული უნდა შექმნა. ტრადიციული სასწავლო მოდელისგანაც სწორედ ამით განსხვავდება მაიამის კრეატიული სკოლის სწავლების მეთოდები. სწავლება პრაქტიკულ ცოდნას ეფუძნება, თეორიებსაც სწავლობ, მაგრამ მთავარ გამოცდილებას შენივე იდეებზე მუშაობითა იღებ. სწავლის დასრულების შემდეგ გრჩება არა მხოლოდ კარგი თეორიული ცოდნა, არამედ პორტფოლიო, რომელიც შეგიძლია მსოფლიოს წამყვან სააგენტოებში წარადგინო“.
ბერლინი
,,არასდროს მიფიქრია, რომ უამინდო ბერლინი ჩემი ქალაქი იქნებოდა, მაგრამ იმაზე საინტერესო და მრავალფეროვანი აღმოჩნდა, ვიდრე წარმოვიდგენდი. აქ ყველას შეუძლია იპოვოს თავისი კუთხე, თითქოს ერთი ქალაქი ბევრ სხვადასხვა ქალაქს იტევს და აერთიანებს. განსაკუთრებით იმ ადამიანებისთვისაა ქალაქი საინტერესო, ვისაც კულტურა და ხელოვნება აინტერესებს, უყვარს კინო, მუსიკა, მუზეუმები, ფესტივალები. ქალაქსა და ახალ კულტურას ნელ-ნელა ვეცნობი, გარემოსთან ადაპტირებაც არ მიჭირს“.
როგორც სოფი ამბობს, მაიამის სკოლის დასრულების შემდეგ სურს თანამშრომლობა რომელიმე საერთაშორისო სააგენტოსთან გააგრძელოს კრეატიული მიმართულებით, თუმცა გამოცდილების მიღების შემდეგ კარიერის გაგრძელებას საქართველოში განიხილავს.
სოფი იმ ადამიანებს, რომლებიც ვერ ბედავენ ნაბიჯის გადადგმას, ურჩევს:
,,საუკეთესო განცდაა, როდესაც საკუთარ შიშებს უსწორებ თვალს და კომფორტის ზონიდან გამოდიხარ, ამ დროს პოულობ ძალას, რომელიც არც გეგონა, რომ გქონდა, არავის და არაფერს დაუჯეროთ, რომ რამე არ შეგიძლიათ და საკმარისად კარგები არ ხართ“
საქართველოს ბანკი Miami Ad School Europe-თან უკვე 4 წელია თანამშრომლობს და ნიჭიერ ახალგაზრდებს ბერლინის საუკეთესო კრეატიულ სკოლაში 100%-იანი დაფინანსებით სწავლის შესაძლებლობას აძლევს. სოფის ამბავი ამტკიცებს, რომ ყველა თავგადასავალი და წარმატება ცდითა და გამბედაობით იწყება.
თუ შენც გაინტერესებს კოპირაიტინგი, ვიზუალური თხრობის ხერხები, არტ დაირექშენი, მაგრამ, სოფის მსგავსად, ფიქრობ, რომ სხვა კანდიდატებს კონკურენციას ვერ გაუწევ, გახსოვდეს, რომ საუკეთესო წინ არის და შესაძლოა 2024 წლის სტიპენდიატი სწორედ შენ ხარ.