ხელოვნება, გავლენიანი მოდის სახლები და დიზაინერები, საუცხოო გემოვნება და ინდვიდუალურობა — პირველი ქალაქი, რომელიც მოდაზე საუბრისას გვახსენდება, პარიზია. სწორედ პარიზი მასპინძლობის მოდის ინდუსტრიაში ერთ-ერთ ყველაზე ღირსშესანიშნავ და დასამახსოვრებელ მოვლენას — პარიზის მოდის კვირეულს, რომელსაც მთელი მსოფლიო მუდამ დიდი ინტერესით ელოდება.
2024 წლის შემოდგომა/ზამთრის სეზონი პარიზში 26 თებერვალს გაიხსნა და ის დაახლოებით 70 შოუს აერთიანებს. აქ სხვადასხვა ქვეყნიდან განსხვავებული პროფესიის ადამიანებს ერთი რამ — მოდის სიყვარული აერთიანებთ. Dior, Chanel, Balenciaga, Valentino და სხვები — კვირეულის ფარგლებში, ყველა სულმოუთქმელად ელის გავლენიან მოდის სახლებს, რომლებიც ათწლეულებზე მეტია, თავიანთ სათქმელსა და უნიკალურ ხედვას პოდიუმზე სამოსისა და აქსესუარების დახმარებით გამოხატავენ. რა თქმა უნდა, ცნობილ ბრენდებთან ერთად, კვირეულზე თავის გამოჩენისა და მოდის ინდუსტრიაში დამკვიდრების შესაძლებლობა დამწყებ დიზაინერებსაც ეძლევათ.
პარიზის მოდის კვირეული, დიზაინერების გარდა, განსაკუთრებულად მნიშვნელოვანია გამოცდილი თუ დამწყები მოდელებისთვის, ვისთვისაც პოდიუმზე გამოჩენა კარიერის განვითარების უდიდესი შესაძლებლობა და წარმატების წინაპირობაა. თუმცა მოდის კვირეულზე პოდიუმი ბრენდების ჩვენებებს სცდება და პარიზის ქუჩებშიც ინაცვლებს: მოდის მოყვარულები თავიანთი ინდივიდუალურობის, გემოვნებისა თუ ხედვის წარმოჩენას ქუჩის სტილით ცდილობენ და ფოტოგრაფების ობიექტივშიც ხვდებიან. თამამად შეიძლება ითქვას, რომ მოდის კვირეულის დროს მთელი პარიზი ერთი დიდი პოდიუმია, თითოეული ადამიანი კი — მოდელი.
კვირეული იმითაცაა მნიშვნელოვანი, რომ აქ შეკრებილი დიზაინერები, მოდის კრიტიკოსები, მოდელები, ცნობილი ადამიანები და უბრალოდ მოდის მოყვარულები მომავალი წლის მთავარ ტრენდებსა და მიმართულებებს განსაზღვრავენ. სამოსი და აქსესუარები, რომლებსაც პარიზის მოდის კვირეულზე წარადგენენ, მაღაზიებსა და წითელ ხალიჩებზე გადაინაცვლებს, შემდეგ კი, გარკვეულწილად, ჩვენს გემოვნებასა და ყოველდღიურ ჩაცმულობასაც განსაზღვრავს.
2018 წლიდან პარიზის მოდის კვირეულის განრიგში, სხვა გავლენიან თუ ახალ მოდის სახლებთან ერთად, ქართული ბრენდი SITUATIONIST-იც არის. SITUATIONIST ქართველმა დიზაინერმა, ირაკლი რუსაძემ, 2017 წელს თბილისში დააფუძნა და მისი პოპულარულობა ქვეყნის საზღვრებს მალევე გაცდა. ბრენდის ხედვა ტრადიციული ქართული კულტურისა და თანამედროვე ტენდენციების ჰარმონიული შერწყმის შედეგად ჩამოყალიბდა, რითაც როგორც საქართველოს, ისე საერთაშორისო ბაზარზე მოდის მოყვარულების განსაკუთრებული ყურადღება დაიმსახურა.
გამონაკლისი არც SITUATIONIST-ის 2024/2025 წლის შემოდგომა-ზამთრის კოლექციაა, რომელიც ტრადიციული ქართული კულტურისა და თანამედროვე ელემენტების საუცხოო სინთეზია. ამაზე ისიც მეტყველებს, რომ სამოსის შესაქმნელად ქსოვის ტრადიციული მეთოდებია გამოყენებული, ხოლო კოლექციის წარსადგენად ფოტოები და ვიდეო საქართველოში, შთამბეჭდავი ბუნებისა და ისტორიული არქიტექტურის ფონზეა გადაღებული.
პარიზის მოდის კვირეულის განრიგში მოხვედრა ქართული კულტურის პოპულარიზაციისა და SITUATIONIST-ის სამომავლო წარმატების შესანიშნავი შესაძლებლობაა. აღსანიშნავია, რომ პარიზის მოდის წლევანდელ კვირეულზე ბრენდის წარმდგენი და სპონსორია SOLO და Visa.