წიგნების თაროს გამარჯვებულების საყვარელი წიგნები – „ჰაგაკურე“ გირჩევთ

გასაკვირი არავისთვის იქნება, რომ სატელევიზიო გადაცემა წიგნების თაროს სტუდენტური სეზონის გამარჯვებული გუნდის – “ჰაგაკურეს“ წევრები, რომლებიც თავისუფალი უნივერსიტეტის სტუდენტები არიან, ლიტერატურა ძალიან უყვართ.

ქვემოთ სამი ჟანრის მიხედვით მათ ფავორიტ წიგნებს წარმოგიდგენთ და ვინ იცის, იქნებ შემდეგი საკითხავის არჩევაშიც კი დაგეხმაროთ მათი რეკომენდაციები:

თამარ გელაშვილი:

• საყვარელი დეტექტივი

და აღარავინ დარჩა

აგათა კრისტის ეს რომანი თავის ჟანრში გამორჩეულად მისტიკური და შემზარავია. იგი ბევრად უფრო კომპლექსურია, ვიდრე ყველა სხვა დეტექტივი – მასში ვერც გამომძიებელს შეხვდებით და ვერც კლასიკურ სიუჟეტს.

• საყვარელი სამეცნიერო ფანტასტიკა

სოლარისი

ჩემთვის ყველაზე ლამაზი და ესთეტიკური სამეცნიერო ფანტასტიკაა – წიგნი პლანეტა-ოკეანეზე, რომელიც მკითხველსაც ნამდვილი ოკეანესავით ითრევს.

• ფენტეზის ჟანრის საყვარელი ნაწარმოები

ჰობიტი

კომფორტისა და სიმშვიდის მოყვარული ჰობიტი ბილბოს თავგადასავალი ულამაზეს და უჯადოსნურეს ტოლკინისეულ სამყაროში ჩემთვის მუდამ ღიმილისმომგვრელი და სასიამოვნო წასაკითხი იქნება.

ნინი დვალი:

• საყვარელი დეტექტივი

შერლოკ ჰოლმსის თავგადასავალი

ეს ერთ-ერთი იმ წიგნებიდან, რომლებიც ჩემთვის ბავშვობასა და დადებით ემოციებთან ასოცირდება.

• საყვარელი სამეცნიერო ფანტასტიკა

451 ფარენჰაიტით

ეს ისტორიაა სამყაროზე, რომელშიც წიგნი ადამიანის მტრად ითვლება. ნაწარმოებმა კიდევ უფრო დამაფიქრა წიგნების დადებით ზეგავლენაზე ჩვენს ყოველდღიურობაში და გამაანალიზებინა, რომ მათ გარეშე სწორედ იმ კონტროლირებად სამყაროში მოგვიწევს ცხოვრება, რომელიც მასშია აღწერილი. 

• ფენტეზის ჟანრის საყვარელი ნაწარმოები

ჰარი პოტერი და ნახევარპრინცი

ჯოან როულინგმა დაწერა სამყაროზე, სადაც ცხოვრება ბევრ ჩვენგანს ერთხელ მაინც უნატრია. ჰარი პოტერი და ნახევარპრინცი ჯადოსნური სერიიდან ჩემთვის ყველაზე გამორჩეული და კომპლექსურია, რადგან სწორედ ამ ნაწილში ეხდება ბევრ საიდუმლოს ფარდა.

საბა გელაშვილი

• საყვარელი დეტექტივი

დიდი ოთხეული

ჩემთვის ეს პირველი წიგნია, რომელიც აგათა ქრისტის შემოქმედებიდან წავიკითხე და ამიტომ მიყვარს განსაკუთრებით. ძალიან ჩამთრევი და საინტერესო იყო, როგორც მისი სხვა ნაწარმოებები.

• საყვარელი სამეცნიერო ფანტასტიკა

სიზმარი არმაგედონზე 

ჰერბერტ უელსის სხვა ნაწარმოებებთან შედარებით ჩემთვის  სიზმარი არმაგედონზე გამორჩეულია ამბის გადმოცემის უჩვეულო სტილის გამო. მომავლის ტრადიციული წინასწარმეტყველება, რომელიც დამანგრეველ გლობალურ კატასტროფებს გვიქადის, ასახულია სიზმრისეული გამოცდილების სახით. ნაწარმოების სიუჟეტის ცვალებადობა რეალურ და სიზმრისეულ სამყაროს შორის კი წარუშლელი შთაბეჭდილების მომხდენია მკითხველისთვის.

• ფენტეზის ჟანრის საყვარელი ნაწარმოები

ამერიკელი ღმერთები

ეს ნაწარმოები არის თანამედროვეობისა და მითოლოგიის უჩვეულო ნაზავი. მთავარ პერსონაჟთან ერთად ვეცნობით ძველ ღმერთებს, მათ მავნე ჩვევებს, ახირებებსა და დიად მიზნებს. გარდა უშუალოდ ამბის ჩახლართულობისა, ეს ნაწარმოები შეიძლება საკმაოდ შემეცნებითადაც აღვიქვათ მითოლოგიით დაინტერესებული ადამიანებისთვის.