რატომ უნდა განახორციელო ინვესტიცია სოციალურ მედიაში

სოციალური მედია XXI საუკუნის ერთ-ერთი უმნიშვნელოვანესი ინოვაციაა, რომელმაც საზოგადოების ქცევა და საუკუნეების განმავლობაში არსებული სტანდარტები შეცვალა.

სოციალურმა ქსელებმა ჩვეულებრივ მოქალაქეებს თავის წარმოჩენის არნახული შესაძლებლობები მისცეს, ზოგიერთისთვის კი სოციალური მედია ძირითად შემოსავლის წყაროდ და პროფესიად იქცა.

უკვე დიდი ხანია, რაც ამ ტექნოლოგიური რევოლუციის სათავეში ამერიკელი მეწარმე მარკ ცუკერბერგი დგას, რომელმაც საზოგადოებას Facebook-ი გააცნო. მართალია, Facebook-ის შექმნიდან თითქმის 20 წელიწადია გასული, თუმცა ტექნოლოგიური გიგანტი პირველობას ისევ არ თმობს. უფრო მეტიც, დროსთან ერთად, Facebook-ის მფლობელი კომპანიის, Meta-ს პორტფელი გაიზარდა და მას სხვა სოციალური პლატფორმებიც დაემატა, მათ შორისაა: Instagram, Messenger, WhatsApp და Threads.   

საერთო ჯამში, Meta-ს მფლობელობაში არსებული სოციალური ქსელები 4 მილიარდამდე აქტიურ მომხმარებელს აერთიანებენ, რაც პლანეტის მოსახლეობის ნახევარზე მეტია. მომხმარებლების ასეთი რაოდენობა კომპანიას კოლოსალური მოცულობის მონაცემებთან აძლევს წვდომას, რასაც Meta-ს ალგორითმი ფინანსური სარგებლის მისაღებად იყენებს. კომპანიის საბაზრო შეფასება ამჟამად 985 მილიარდ დოლარს აღწევს, რაც ერთწლიან პერიოდში დაახლოებით 170%-ით გაზრდილი მაჩვენებელია. ექსპერტების შეფასებით, წელს ცუკერბერგის მიერ დაფუძნებული კომპანია ტრილიონიანი კაპიტალიზაციის მქონე კომპანიების ექსკლუზიურ კლუბსაც შეუერთდება.

ბუნებრივია, Meta-ს აქციების ზრდით ყველაზე დიდ სარგებელს კომპანიის ინვესტორები იღებენ, რომელთაც ერთ წელიწადში ინვესტიცია თითქმის გაუორმაგდათ. საბედნიეროდ, Meta-სა თუ სხვა ნებისმიერ ამერიკულ კომპანიაში თანხის დაბანდება იმაზე გაცილებით მარტივია, ვიდრე ეს ერთი შეხედვით ჩანს. ამისათვის მობილბანკში, ინვესტიციების მოდულში სასურველი კომპანიის არჩევა და ორ ღილაკზე თითის დაჭერაა საჭირო.

ცხადია, სოციალური ქსელების ინდუსტრია მხოლოდ Meta-ს არ მოიცავს ამ ბაზარზე სხვა მოთამაშეებიც არიან, მათ შორისაა Google-ი, რომელიც მსოფლიოს ყველაზე მოთხოვნად საძიებო სისტემას და რიგით მეორე ყველაზე პოპულარულ სოციალურ პლატფორმას, YouTube-ს ფლობს. რაც არ უნდა უცნაური იყოს, Google-ის შემოსვლების მნიშვნელოვანი ნაწილი სოციალურ ქსელებში რეკლამების განთავსებაზე მოდის, რადგან იმ მონაცემებს, რომელთაც მომხმარებლები Google-ს აწვდიან, კომპანია სოციალურ ქსელებზე ყიდის. სწორედ ეს ხსნის იმ ფენომენს, თუ როგორ ხვდება ხუთი წუთის წინ „დაგუგლული“ ნივთი თქვენი Facebook-ისა და Instagram-ის რეკლამების ჩამონათვალში.

Google-ისა და Meta-ს სიმბიოზი კაცობრიობის ისტორიაში ერთ-ერთი ყველაზე წარმატებულია, რადგან ამ თანამშრომლობის შედეგად Google-ის მშობელი კომპანიის, Alphabet-ის კაპიტალიზაციამ $1.84 ტრილიონს მიაღწია. უნდა აღინიშნოს, რომ გასული ერთი წელიწადი Google-ისთვისაც წარმატებული იყო და მისი აქციების ღირებულება ბირჟაზე 46%-ით გაიზარდა.      

Meta-სა და Google-ის გარდა, სოციალური ქსელების ბაზარზე სხვა მსხვილი ტექნოლოგიური კომპანიები და პლატფორმებიც აქტიურობენ, მათ შორისაა: ByteDance-ის მიერ შექმნილი გასართობი აპლიკაცია TikTok-ი; Tencent-ის WeChat-ი, რომელიც აზიურ სამყაროში უპირობო ლიდერია; ილონ მასკის მფლობელობაში არსებული X/Twitter-ი და Snapchat-ი.

გარდა ამისა, პროფესიული სოციალური ქსელები ბაზარზე ლიდერი LinkedIn-ია, რომელსაც მსოფლიოს უმსხვილესი კომპანია Microsoft-ი ფლობს.

გასართობი, შემეცნებითი თუ პროფესიული ქსელების გარდა, მომხმარებლები აქტიურად იყენებენ გაცნობის აპლიკაციებსაც, ამ მიმართულებით ბაზრის უმსხვილესი მოთამაშე Match Group-ია, რომელიც ათამდე პლატფორმას აერთიანებს, მათ შორის, Tinder-სა და Hinge-ს.

სოციალური ქსელების ასეთი მრავალფეროვნება იმაზე მიუთითებს, რომ საზოგადოების ინტერესი ამ ტიპის სერვისების მიმართ საკმაოდ მაღალი და თან მზარდია. როგორც ირკვევა, საშუალო მომხმარებელი სოციალურ ქსელებში დღიურად 2 საათს ატარებს, ახალგაზრდებში კი ეს მაჩვენებელი 4.8 საათს აჭარბებს. სოციალურ ქსელებში მომხმარებლების მიერ გატარებული ყოველი წამი ინდუსტრიისთვის დამატებითი შემოსავლის მიღებას ნიშნავს, ამ მოცემულობით სარგებლის მიღება კი მობილბანკით მარტივადაა შესაძლებელი.