საქართველოს ბანკის, USAID-ის, PH International-ისა და GELi-ს თანამშრომლობით ჩატარდა კინგსის ოლიმპიადა ფინანსურ განათლებაში ცოდნის შესამოწმებლად. გარდა იმისა, რომ ასეთი აქტივობები მოსწავლეების საგანმანათლებლო ცხოვრებისთვის ყოველთვის ძალიან მნიშვნელოვანია, როგორც გამარჯვებულები აღნიშნავენ, ფინანსური განათლების მსგავს თემებზე ჩატარებული შეხვედრები და შემეცნებითი პროექტები შესაძლებლობას აძლევს მათ, რომ განსხვავებული ცოდნა მიიღონ და უკეთესად დაფიქრდნენ, სამომავლო კარიერა რა სფეროს შეიძლება დაუკავშირონ.
“ოლიმპიადაზე იმიტომ დავრეგისტრირდი, რომ ძალიან უცხო და ახალი იყო ეს მიმართულება ჩემთვის. შესაბამისად, გამარჯვებაც მოულოდნელი და სასიამოვნო აღმოჩნდა. ოლიმპიადებში მე-2 კლასიდან ვიღებ მონაწილეობას, თუმცა ეს სრულიად განსხვავებული იყო. ერთ-ერთი მიზანიც სწორედ ეს იყო — გამომეცადა რაიმე ახალი და გავრკვეულიყავი, რა მინდა სამომავლოდ“, – ამბობს თბილისის კლასიკური გიმნაზიის მე-8 კლასის მოსწავლე, ეკატერინე ჩაჩანიძე.
როგორც თვითონ აღნიშნავს, ოლიმპიადის შესახებ ინტერნეტის საშუალებით გაიგო, მომზადებაც დამოუკიდებლად დაიწყო და შედეგიც მიიღო, რადგან მოსამზადებელი მასალა კინგსის ვებსაიტის მეშვეობით საინტერესოდ და გასაგებ ენაზე იყო მიწოდებული.
ოლიმპიადაში მონაწილეობა მე-7-დან მე-12 კლასის ჩათვლით მოსწავლეებმა მიიღეს. თითოეულ კლასში, ქვეყნის მასშტაბით, თითო პირველადგილოსანი გამოვლინდა, რომელთაც საქართველოს ბანკისგან საჩუქრად პლანშეტები და სიმბოლური სუვენირები გადაეცათ. აღსანიშნავია, რომ მეორე ადგილზე გასულ მოსწავლეებს გადაეცათ ყურსასმენები, ხოლო მესამეადგილოსნებს – ბიზნესლიტერატურა.
მე-7 კლასის გამარჯვებული ქუთაისის ქართულ-ამერიკული სკოლა “პროგრესის” მოსწავლე ელენე გუგეშაშვილია. ელენეს თქმით, მთავარი გავლენა მასზე მამიდამ მოახდინა:
“მამიდაჩემის გავლენით მომინდა, რომ მეც ვყოფილიყავი საკითხში ჩახედული და რაღაც მხრივ შევხებოდი ამ სფეროს. საგანი გვაქვს „ფინანსური წიგნიერება“ და ამ საგნის მასწავლებელმა, ნანუკა კუპრეიშვილმა გაგვაგებინა მთელ კლასს ოლიმპიადის შესახებ. მისი წვლილი ძალიან დიდია, ყველა კლასთან ჰქონდა მცდელობა, რომ ოლიმპიადაზე გაეყვანა. ჩვენი სკოლიდან კიდევ ერთი მოსწავლე მე-3 ადგილზე გავიდა”.
ოჯახის გავლენაზე საუბრობს კიდევ ერთი გამარჯვებული, დავით ბოლქვაძე. დავითი ბათუმის ქართულ-ამერიკული სკოლის მე-11 კლასის მოსწავლეა.
“ჩვენს სკოლას ხშირად სტუმრობენ კინგსის წარმომადგენლები და ასე მივიღე ინფორმაცია. კინგსის ოლიმპიადებშიც ბავშვობიდან ვიღებ მონაწილეობას, მაგრამ ასეთი მასშტაბის გამოცდილება პირველი იყო. ოლიმპიადის ჩატარებამდე დიდი ცოდნა მოგვცეს, გვამზადებდნენ ამისთვის — სპეციალისტებთან გვქონდა შეხვედრა, გვყავდნენ ტრენერები, ასევე გვქონდა ელექტრონული სახელმძღვანელოები, რომლითაც ვემზადებოდით. დიდი გამოცდილება შემძინა როგორც ოლიმპიადის, ისე ბიზნეს განათლების მხრივაც.”
ლუკა ყრუაშვილი თბილისის 179-ე საჯარო სკოლის მე-9 კლასის მოსწავლეა. ამბობს, რომ სჯეროდა საკუთარი თავის და ამ რწმენამ გაამართლა კიდეც.
“ვიცოდი, რომ შევძლებდი და გამომივიდა. მოსამზადებლად ვიდეო და ტექსტურ მასალას ვიყენებდი, ასევე, ძალიან დამეხმარა შეხვედრები, რომელიც ფინანსური განათლების შესახებ ჩატარდა და დიდი ინფორმაცია მოგვცა ამ თემის შესახებ. ასეთი დიდი ოლიმპიადა პირველი გამოცდილებაა და თუ ისევ ჩატარდება, აუცილებლად მივიღებ მონაწილეობას. ფინანსებით დაინტერესებული ვარ და ვფიქრობ, რომ ერთ-ერთი დიდი ნაბიჯი და გამოცდილება იყო ეს ოლიმპიადა, რომელიც სამომავლოდ დამეხმარება”.
ბუნებრივია, რომ ფინანსური გადაწყვეტილებები დიდწილად განსაზღვრავს ცხოვრების ხარისხსა და ჩვენს კეთილდღეობას. ამიტომ მნიშვნელოვანია, რომ ამ თემის შესახებ ინფორმაცია ადრეული ასაკიდანვე გვქონდეს. ახალგაზრდებს საშუალება მიეცეთ ბიუჯეტის სწორად დაგეგმვა და გადაწყვეტილებების მიღება ისწავლონ.
როგორც მე-10 კლასის გამარჯვებული, ანანო ჯიჯიაშვილი ამბობს, საგანმანათლებლო შეხვედრებსა და ოლიმპიადაში მონაწილეობა დაეხმარა, რომ სამომავლო კარიერაზე დაფიქრებულიყო: .
“თბილისის ნიკოლოზ ბარათაშვილის სახელობის 212-ე საჯარო სკოლის მოსწავლე ვარ. ოლიმპიადის შესახებ ინფორმაცია “სამოქალაქო განათლების” მასწავლებელმა მოგვაწოდა. მინდოდა, სხვადასხვა მიმართულებით გამომეცადა თავი, მინდოდა, მცოდნოდა, ვხედავდი თუ არა საკუთარ თავს ფინანსების სფეროში. ეს ოლიმპიადა კი კარგი საშუალება აღმოჩნდა ამისთვის“.
საქართველოს ბანკი, როგორც მაღალი სოციალური პასუხისმგებლობის მქონე კომპანია, ყველასთვის განათლების შესაძლებლობების შექმნას უწყობს ხელს და მისი საქმიანობის ერთ-ერთი პრიორიტეტული მიმართულება მომავალი თაობის შემეცნებაზე ზრუნვაა. კინგსის ფინანსური ოლიმპიადა ერთ-ერთი ასეთი წარმატებული პროექტია, რომელიც საქართველოს ბანკის მხარდაჭერით განხორციელდა.