ნახევარგამტარებისა და კომპიუტერული ჩიპების წარმოების ინდუსტრია ზრდის განსაკუთრებით მაღალი ტემპით გამოირჩევა. ანალიტიკოსების პროგნოზით, მომდევნო 10 წლის განმავლობაში ინდუსტრიის შეფასება დაახლოებით 200%-ით მოიმატებს, რაც იმას ნიშნავს, რომ ამ სექტორში წარმოდგენილი კომპანიები უფრო მეტი შემოსავლის მიღებას შეძლებენ, რაც მათი აქციების ღირებულებაზე პოზიტიურად აისახება.
ზრდის ტენდენციას რამდენიმე ფაქტორი განაპირობებს, მათ შორის ყველაზე მნიშვნელოვანი კი მსოფლიოს მასშტაბით ელექტრონულ მოწყობილობებზე მოთხოვნის ზრდაა.
მოგეხსენებათ, ჩიპებსა და ნახევარგამტარებს იყენებენ როგორც სმარტფონებში, კომპიუტერებში, მაცივრებსა და სარეცხის მანქანებში, ასევე კოსმოსურ ხომალდებსა და ავტომობილებში. ეს მოცემულობა კი იმაზე მიუთითებს, რომ მსოფლიოში ყოველწლიურად იმაზე მეტი ნახევარგამტარის წარმოებაა საჭირო, ვიდრე ეს ადრე იყო საკმარისი. ამ ტიპის საქონელზე მოთხოვნის ზრდას განსაკუთრებით აჩქარებს ბაზარზე ელექტრომობილების გამოჩენა, რადგან ამ ტიპის ტრანსპორტი ჩვეულებრივ ავტომობილთან შედარებით თითქმის 5-ჯერ მეტი რაოდენობის ნახევარგამტარებს საჭიროებს.
ნახევარგამტარების წარმოების მიმართულებით რამდენიმე მსხვილი კომპანია ლიდერობს, მათ შორის განსაკუთრებით გამორჩეული კი ტაივანური ტექნოლოგიური გიგანტი TSMC-ია, რომელიც საფონდო ბირჟაზე 539 მილიარდ დოლარადაა შეფასებული და მისი აქციების ღირებულება მიმდინარე წელს 30%-ითაა გაზრდილი. მსოფლიოს მასშტაბით წარმოებული ჩიპების უდიდესი ნაწილი სწორედ TSMC-ზე მოდის, რაც მას გეოპოლიტიკური მნიშვნელობის კომპანიად აქცევს, რომელიც ფაქტობრივად ნებისმიერი სახის ელექტრონული პროდუქტის მიწოდების ჯაჭვშია ჩართული.
ამ სექტორის უმსხვილესი მოთამაშეა ამერიკული NVIDIA, რომელიც ბირჟაზე 1 ტრილიონ 225 მილიარდ დოლარადაა შეფასებული და ერთწლიან პერიოდში მისი აქციების ზრდის მაჩვენებელი 250%-ს აღწევს. NVIDIA თამამად შეიძლება ჩაითვალოს წლის ყველაზე წარმატებულ კომპანიად, რაც პირდაპირ კავშირშია ხელოვნური ინტელექტის ბუმთან და კომპანიის მიერ სპეციალური AI-პროცესორის შექმნასთან, რომელსაც აქტიურად იყენებენ ის ტექნოლოგიური კომპანიები, რომელთაც AI-ს განვითარება სურთ. გარდა ამისა, უკვე წლებია, რაც NVIDIA ვიდეო თამაშების ინდუსტრიაში ლიდერად რჩება და მის მიერ წარმოებულ ვიდეო ბარათებს (GPU) გეიმერები მთელი მსოფლიოს მასშტაბით აქტიურად იყენებენ.
ერთწლიან პერიოდში გამორჩეული შედეგები აქვს NVIDIA-ს ერთ-ერთ მთავარ კონკურენტს, AMD-ს, რომლის აქციების ღირებულება 120%-ითაა გაზრდილი და კომპანიის საბაზრო შეფასება $226 მილიარდს აღწევს. როგორც ცნობილია, ამჟამად კომპანია ახალი თაობის AI-ჩიპის შექმნაზე მუშაობს, რაც AMD-ს შემოსავლების გაზრდის საშუალებას მისცემს.
ნახევარგამტარების ინდუსტრიაში კიდევ ერთი საინტერესო კომპანიაა წარმოდგენილი, რომელიც $160 მილიარდადაა შეფასებული და მისი სახელწოდება Qualcomm-ია. ეს კომპანია მსოფლიოს ყველაზე მოთხოვნად მობილურ ჩიპებს ქმნის და Qualcomm-ის Snapdragon-ის სერიის პროცესორებს შეხვდებით როგორც ბიუჯეტურ, ასევე ფლაგმანურ სმარტფონებში.
ზემოხსენებული კომპანიების აქციების შეძენა საქართველოს ბანკის საინვესტიციო პლატფორმის მეშვეობით მარტივადაა შესაძლებელი, თუმცა თუ არჩევანის გამარტივება და ინვესტიციის რამდენიმე კომპანიაზე გადანაწილებას გსურთ, მაშინ შეგიძლიათ ნახევარგამტარების ინდუსტრიული ფონდი, მაგალითად, SPDR Semiconductor ETF (XSD) შეიძინოთ.
ამ სექტორში ინვესტირებისას აუცილებლად უნდა იქნეს გათვალისწინებული რამდენიმე რისკ-ფაქტორი, მათ შორის ერთ-ერთია გეოპოლიტიკური მდგომარეობა. როგორც უკვე აღვნიშნეთ, ნახევარგამტარების წარმოების ინდუსტრიას სახელმწიფოები ეროვნული უსაფრთხოებისთვის მნიშვნელოვან სფეროდ განიხილავენ, ამიტომაც აშშ-ჩინეთის ურთიერთობების გაუარესებამ, ტაივანის ბლოკადამ ან ევროკავშირის მიერ ახალი შეზღუდვების დაწესებამ, შესაძლოა, ნეგატიური ზეგავლენა იქონიოს ზოგიერთი კომპანიის აქციების ღირებულებაზე. ამ რისკისგან თავის დაზღვევის საუკეთესო საშუალება ინვესტიციის რამდენიმე კომპანიაზე გადანაწილება ან პირდაპირ ინდუსტრიული ETF-ის შეძენაა, რომელიც სექტორში წარმოდგენილ 100-მდე კომპანიას აერთიანებს.
რისკების მიუხედავად, უნდა აღინიშნოს, რომ ნახევარგამტარების წარმოების ინდუსტრია საკმაოდ სტაბილური შემოსავლებით გამოირჩევა, რაც იმ ფაქტითაა განპირობებული, რომ ელექტრონულ მოწყობილობებზე მოთხოვნა ყოველწლიურად იზრდება, ჩიპებისა და ნახევარგამტარების გარეშე კი ამ მოწყობილობების წარმოება უბრალოდ შეუძლებელი იქნება.