თუკი ბაკალავრის ხარისხი უკვე მიიღე და ახლა ფიქრობ, გინდა თუ არა სამაგისტრო საფეხურზე სწავლის გაგრძელება, შენთვის ერთი საინტერესო ამბავი გვაქვს მოსაყოლი. ჩივნინგის სასტიპენდიო პროგრამაზე თუ გსმენია? პროგრამა 1983 წელს დაფუძნდა და. მას გაერთიანებული სამეფოს საგარეო საქმეთა სამინისტრო პარტნიორ ორგანიზაციებთან ერთად ახორციელებს. პროგრამა მიზნად ისახავს, უმაღლესი ხარისხის განათლების მიღების შესაძლებლობა მსოფლიოს სხვადასხვა კუთხეში მცხოვრებ ახალგაზრდებს მისცეს.
პარტნიორ ორგანიზაციებს შორისაა საქართველოს ბანკიც, რომელმაც პროგრამის ფარგლებში 2013 წლის შემდეგ 26 სტუდენტი უზრუნველყო თავისი მხარდაჭერითა და დაფინანსებით. დაფინანსება კი ყველანაირ ხარჯს მოიცავს: არა მხოლოდ სწავლის საფასურს, ყოველთვიურ სტიპენდიასაც, დისერტაციის გრანტს, მგზავრობისა და ვიზის გადასახადს.
ჩივნინგის ერთწლიანი პროგრამა უსაზღვრო შესაძლებლობებს გაძლევს. თუკი გსურს, შენც გახდე ამ ყველაფრის მონაწილე, საჭირო მხოლოდ აპლიკაციის შევსებაა. გამარჯვებული აპლიკანტებიდან სამი საქართველოს ბანკის სტიპენდიანტი გახდება. ნებისმიერ შეკითხვაზე პასუხის მისაღებად შეგიძლია გაიარო საკონსულტაციო კურსი.
თუმცა, ყველაზე მნიშვნელოვანი, რა თქმა უნდა, უნივერსიტეტის შერჩევაა. რასაკვირველია, საკონსულტაციო კურსიც დაგეხმარება, სასწავლებელი შენი ინტერესებისა და მისწრაფებების გათვალისწინებით შეარჩიო, მაგრამ ბოლო სიტყვა მაინც შენ გეკუთვნის. არჩევანის გაკეთება რომ უფრო გაგიადვილდეს, მოდი, ავტორიტეტული გამოცემა The Times-ის მიერ დასახელებულ 5 საუკეთესო ბრიტანულ უნივერსიტეტზე მოგიყვებით.
1. სენტ-ენდრიუსის უნივერსიტეტი
The Times-ის შედგენილ გზამკვლევში სენტ-ენდრიუსის უნივერსიტეტმა, რომელიც ერთ-ერთი უძველესი ინგლისურენოვანი უმაღლესი სასწავლებელია, ისეთ დაწესებულებებს გადაუსწრო, როგორებიც ოქსფორდი და კემბრიჯია.
1413 წელს დაფუძნებულ სენტ-ენდრიუსის უნივერსიტეტში სწავლებისა და კვლევის 6-საუკუნოვანი გამოცდილება აქვთ. ისტორიულ ნაგებობაში განთავსებული სასწავლებელი სტუდენტებს მეგობრულ გარემოს, პიროვნული და პროფესიული განვითარების შესაძლებლობებს სთავაზობს. სტუდენტებისთვის საცხოვრებლად უნივერსიტეტს 4 000-ზე მეტი ოთახიც აქვს გამოყოფილი, ასე რომ, თავი კლასიკურ ბრიტანულ პანსიონში შეგიძლია წარმოიდგინო. სხვათა შორის, პრინცი უილიამი და პრინცესა ქეთრინი სწორედ სენტ-ენდრიუსის უნივერსიტეტში სწავლობდნენ.
სენტ-ენდრიუსის გამორჩეულ პროგრამებს შორისაა საერთაშორისო ურთიერთობებისა და კომპიუტერული მეცნიერებების სამაგისტრო კურსები.
2. ოქსფორდის უნივერსიტეტი
დედამიწაზე ძნელად თუ მოიძებნება ადამიანი, რომელსაც ოქსფორდის უნივერსიტეტის შესახებ არ სმენია. ის ინგლისურენოვან სამყაროში უძველეს უმაღლეს სასწავლებლად მიიჩნევა და ამჟამად ოთხ აკადემიურ განყოფილებას აერთიანებს: ჰუმანიტარული მეცნიერებები, მათემატიკა, ფიზიკა და საბუნებისმეტყველო მეცნიერებები, სოციალური მეცნიერებები და მედიცინა. თითოეული ეს მიმართულება კიდევ იყოფა ფაკულტეტებად და სკოლებად.
მრავალსაუკუნოვანი ტრადიციის მქონე ოქსფორდში ფეხდაფეხ მიჰყვებიან ინოვაციებსაც და სწორედ ამის დამსახურებაა, რომ უნივერსიტეტის კურსდამთავრებულები ყველაზე მაღალანაზღაურებად კადრებად ყალიბდებიან. უნივერსიტეტის კურსდამთავრებულებს შორის კი ყველა სფეროში წარმატებულ ადამიანებს შეხვდებით, მათ შორის არიან ჯონ რ.რ. ტოლკინი, სტივენ ჰოუკინგი და ინდირა განდი.
ოქსფორდი სტუდენტებს უმაღლესი ხარისხის განათლებასა და ინტერდისციპლინურ სწავლებასთან ერთად, ლიდერობის უნარ-ჩვევების დაუფლებას და გამოსადეგი საქმიანი კავშირების დამყარებას სთავაზობს. უნივერსიტეტის გამორჩეულ კურსად მიიჩნევა ბიზნესის ადმინისტრირების სამაგისტრო პროგრამა.
3. კემბრიჯის უნივერსიტეტი
რაც შეეხება კემბრიჯს, ის მსოფლიოში მეოთხე უძველეს უნივერსიტეტად მიიჩნევა და 140 ქვეყნიდან ჩასულ 20 ათასზე მეტ სტუდენტს მასპინძლობს. სასწავლებელი 31 კოლეჯს აერთიანებს, მათ კურსდამთავრებულებზე კი შრომის მსოფლიო ბაზარზე დიდი მოთხოვნაა.
კვლავაც დიდი და საინტერესო ტრადიციების მქონე კემბიჯში განსაკუთრებულად აფასებენ ადამიანური ურთიერთობების ჩამოყალიბებას და შედეგად გამოცდილების თუ ცოდნის მიმოცვლას. ამიტომ, მთელი მსოფლიოდან ჩასული სტუდენტები ყოველთვის დადიან ექსკურსიებზე და პატარ-პატარა ექსპედიციებში. ამასთან, შეიძლება კემბრიჯის ხსენებაზე თვალწინ შუა საუკუნეების ნაგებობები წარმოგიდგეთ, მაგრამ სასწავლებელი STEM სფეროში განსაკუთრებული რეპუტაციით სარგებლობს და უახლეს ტექნოლოგიებს უყრის თავს. ამის გამო ადგილს სილიკონის ჭაობსაც კი უწოდებენ (მინიშნება სილიკონ ველიზე და კემბრიჯის ტორფიან ჭაობებზე).
კემბრიჯში ისეთი სახელგანთქმული ადამიანები სწავლობდნენ, როგორებიც ჩარლზ დარვინი და ისააკ ნიუტონი არიან. უნივერსიტეტის გამორჩეულ კურსებად კი ეკონომიკისა და სამართლის პროგრამები მიიჩნევა.
4. ლონდონის ეკონომიკისა და პოლიტიკური მეცნიერების სკოლა
ლონდონის ეკონომიკისა და პოლიტიკური მეცნიერებების სკოლა, რომელსაც LSE აბრევიატურით მოიხსენებენ, ახალგაზრდა სასწავლებლად მიიჩნევა, რადგან 1895 წელს არის დაფუძნებული. ის გამორჩეულ და კონკურენტუნარიან კადრებს ამზადებს ეკონომიკისა, პოლიტიკის, სამართლისა და სოციოლოგიის მიმართულებებით. ბრიტანეთში მიიჩნევა, რომ ვინც საფინანსო სექტორში აპირებს კარიერის მოწყობას, LSE მისთვის ყველაზე ოპტიმალური არჩევანია.
LSE-ის პედაგოგებსა და კურსდამთავრებულებს შორისაა სხვადასხვა სახელმწიფოს თუ რეგიონის 55 მოქმედი ან ყოფილი ლიდერი, ასევე ნობელის 18 ლაურეატი. ამასთან, ევროპულ უნივერსიტეტებს შორის ყველაზე მეტი მომავალი მილიარდერი სწორედ LSE-მ გამოუშვა.
სწავლების თანამედროვე, ინოვაციური მეთოდები და უმნიშვნელოვანესი საქმიანი კავშირები ის მახასიათებელია, რომელიც ლონდონის ეკონომიკისა და პოლიტიკური მეცნიერების სკოლას კონკურენტ სასწავლებლებს შორის გამოარჩევს. სასწავლებლის ყველაზე აღიარებულ კურსად კი, რა თქმა უნდა, ეკონომიკის პროგრამა მიიჩნევა.
5. ლონდონის საიმპერიო კოლეჯი
თუკი შენი პროფესიული მიზნები ბიზნესს უკავშირდება, აუცილებლად უნდა დაფიქრდე ლონდონის საიმპერიო კოლეჯში სწავლაზე. სასწავლებელი მსოფლიოში სამ ყველაზე მსხვილ და გავლენიან ბიზნეს სკოლას შორის მოიაზრება. თუმცა, კოლეჯი ასევე კონცენტრირდება მეცნიერების, ინჟინერიისა და მედიცინის მიმართულებებზე.
სხვადასხვა რეიტინგის მიხედვით, ლონდონის საიმპერიო კოლეჯი მსოფლიოში 10 საუკეთესო უმაღლეს სასწავლებელს შორისაც ხვდება. ალბათ სწორედ ამის გამოა, რომ სასწავლებლით ბრიტანეთს მიღმაც განსაკუთრებულად ინტერესდებიან — კოლეჯის სტუდენტების 59 პროცენტი ხომ სხვა ქვეყნიდანაა ჩასული.
მართალია, კოლეჯმა ლონდონის უნივერსიტეტისგან დამოუკიდებლობა არცთუ დიდი ხნის წინ, 2007 წელს მოიპოვა, მაგრამ აქ სწავლებაცა და კვლევაც დიდ ტრადიციებს ეყრდნობა. საიმპერიო კოლეჯის კურსდამთავრებულებს შორის ნობელის 14 ლაურეატია, მათ შორის, პენიცილინის გამომგონებელი — სერ ალექსანდრ ფლემინგი. ბიზნესის მიმართულების გარდა კი, სასწავლებლის გამორჩეულ პროგრამებად მექანიკური ინჟინერიისა და მედიცინის კურსები მიიჩნევა.