500 Global-ის აქსელერაციის პროგრამა სტარტაპებისთვის უკვე მეხუთედ არჩევს რეგიონში ყველაზე ინოვაციურ, ახალბედა კომპანიებს. საქართველოს ბანკისა და ინოვაციების ტექნოლოგიების სააგენტოს მხარდაჭერით, 500 Georgia შერჩეულ 10 მონაწილეს ეხმარება გახდნენ უკეთესები თავიანთ საქმეში – გაზარდონ მოგება უფრო სწრაფად, მოიძიონ ინვესტიციები უფრო ეფექტიანად და მისწვდნენ სამიზნე აუდიტორიას უფრო ზუსტად. პროგრამის ამ ნაკადის ერთ-ერთი რჩეული Unisub-ია, სტარტაპი, რომელიც ბიზნესებს საშუალებას აძლევს გამოწერის საფასური (subscription fee) კრიპტოვალუტაში მიიღონ.
Unisub-ის დამფუძნებლები ძმები არიან, რომლებიც მიხვდნენ, რომ კრიპტოსამყაროს გაფართოებისას, კრიპტო მომხმარებლების რიცხვის გარდა, იმ ბიზნესების რაოდენობაც იზრდება, რომლებიც კრიპტოვალუტას სერვისის სანაცვლოდ იღებენ. მიუხედავად კრიპტოვალუტის მზარდი მიმღებლობისა, გამოწერასთან დაკავშირებული სერვისების კრიპტოვალუტით მიღება ჯერ კიდევ გამოწვევად რჩებოდა, თუმცა, Unisub ამ პრობლემას წყვეტს! ბიზნესებმა უბრალოდ unisub-ის პლატფორმას თავისი საფულე უნდა დაუკავშირონ, აირჩიონ სასურველი კრიპტოვალუტა, განსაზღვრონ ნებისმიერი ხანგრძლივობის გამოწერის სერვისი და განსაზღვრონ მისი ფასი. Unisub მთლიანად დეცენტრალიზებული, web3 პლატფორმაა და ყველა მსხვილი ბლოკჩეინისა და ტოკენის მიერაა მხარდაჭერილი.
კრიპტოსამყაროს გამოწვევებსა და Unisub-ის მომავალზე სტარტაპის დამფუძნებლებს, ძმებ დავით და ნოდარ კოლმახიძეებს გავესაუბრეთ:
– რა არის და როგორ შეიქმნა Unisub?
– Unisub ფინტექ კომპანიაა, რომელსაც ძმები მაღალკვალიფიციური პროფესიონალებისგან შემდგარ გუნდთან ერთად ვქმნით. Unisub ბიზნესებს აძლევს საშუალებას შექმნან გამოწერის სერვისები კრიპტოში. უკვე 2017 წლიდან, ორივენი სრული დატვირთვით ვმუშაობდით კრიპტო ინდუსტრიაში. ამ დროის განმავლობაში, ბუნებრივია ბევრ პრობლემას წავაწყდით, მათ შორის, ერთ-ერთი გამოწერაზე ორიენტირებული ბიზნესის შექმნის შეუძლებლობა იყო. კრიპტოში მომხმარებლებს თავიანთ საფულეზე სრული კონტროლი აქვთ, ისეთი შუამავალი, რომელიც შენი ანგარიშიდან თანხის ჩამოჭრაში მონაწილეობს, (მაგალითად, ბანკი) აქ არ არსებობს. ასე რომ, დიდი ხნის განმავლობაში, გამოწერის საფასურის გადახდა კრიპტოში ტექნიკურად შეუძლებლად მიიჩნეოდა. მაგრამ, მოხდა ისე, რომ ჩვენ იოლად გადავჭერით პრობლემა და ახლა როგორც ჩვეულებრივ, SaaS, ისე კრიპტოზე დაფუძნებულ კომპანიებთანაც ვთანამშრომლობთ და ვეხმარებით ავტომატურ გამოწერაზე დამოკიდებული ბიზნესის წარმართვაში. პრინციპი ზუსტად ისეთივეა, როგორც საკრედიტო ბარათზე, ოღონდ ყველაფერი კრიპტოში ხდება.
– რა გამოარჩევს Unisub-ს?
– თავიდან, როცა დავიწყეთ, შეიძლება ითქვა, რომ პიონერები ვიყავით, პირველები, ვინ კრიპტოში ავტომატური გადახდების სერვისს სთავაზობდა კომპანიებს. ახლა, უკვე რამდენიმე ასეთი კომპანიაა. თუმცა, დარწმუნებულები ვართ, რომ ჩვენი ტექნოლოგია სხვებისას ჯობნის, რადგან მექანიზმს თავიდანვე ბიზნესის კუთხით მივუდექით – ჩვენი მიზანი იყო შესყიდვის რაც შეიძლება მეტად გამარტივება და შესაბამისად, დიდი აუდიტორიის მოზიდვა. ჩვენი კონკურენტები რთულ ტექნოლოგიებს იყენებენ, მაგალითად ისეთებს, როგორებიცაა Layer-2 ბლოკჩეინები, wrapped ტოკენები, და სხვა საშუალებები… ჩვენ კი იმ გამოცდილებას ვთავაზობთ მომხმარებლებს, რაც უკვე მათთვის ისედაც კარგადაა ნაცნობი – საკრედიტო ბარათის მექანიზმს. მაგალითად, საკმარისია უბრალოდ დაუკავშირო web3 საფულე პლატფორმას, პირველი გადახდა შეასრულო და შემდეგ კი ავტომატურად ჩამოგაჭრით საწევროს, გათვალისწინებული პირობების თანახმად. გვჯერა, რომ სწორედ ეს სიადვილე წაგვწევს სხვებზე წინ და რაც მთავარია, ჩვენს პარტნიორებს დაეხმარება ჰყავდეთ მეტი ერთგული მომხმარებელი და ჰქონდეთ მაღალი LVT მაჩვენებელი.
– რა იყო 500 Georgia-მდე და რამ გადაგაწყვეტინათ აპლიკაციის შევსება?
– პროდუქტი ჩვენ შევქმენით, მთლიანად ჩვენი ხარჯებით და ის გამართულად მუშაობს! მოვიგეთ Smoothie Awards (ProductHunt- ის ანალოგი web3-ში). თუმცა, წარმატების მიუხედავად, ჯერ კიდევ მოგებაზე გასვლამდე შევამჩნიეთ გაყიდვებსა და წვდომებში პრობლემები. ამიტომ, გადავწყვიტეთ 500 Georgia-ს შევერთებოდით, რომ მეტი გაგვეგო ბიზნესის სწორად მართვაზე – ეს ცნობილი პროგრამაა, რომელსაც მსხვილ ქართულ ბანკსა და GITA-სთან პარტნიორობა აკავშირებს. თანაც, რადგან ეთნიკურად ქართველები ვართ, განსაკუთრებით ვამაყობთ, რომ სწორედ საქართველოში ვართ ისეთი შთამბეჭდავი პროგრამის მონაწილე, რომელიც ძალიან ნიჭიერ ხალხს იზიდავს მთელი მსოფლიოდან.
– რას ელით 500 Georgia-სგან?
– დარწმუნებულები ვართ, რომ პროგრამა დაგვეხმარება გაყიდვების მაჩვენებლისა და სხვა მონაცემების გაუმჯობესებაში, მოგვცემს წვდომას ინვესტორებისა და მომხმარებლების ფართო წრეზე, რათა რაც შეიძლება სწრაფად დავიწყოთ მოგებაზე გასვლა. პირველ გაყიდვებს წელს ველით, მომდევნო წლის პირველ ნახევარში კიდევ უფრო გავიზრდებით, ხოლო 2025 წლისთვის, ბაზრის მნიშვნელოვანი ნაწილი ჩვენი იქნება.