ამბობენ, წარმატება და კმაყოფილება მოლოდინების სწორად მართვას მოაქვსო. მოლოდინების მართვა ყველაზე მნიშვნელოვანი ბიზნესშია. სწორედ ამიტომ, საქართველოს ბანკის უფასო საგანმანათლებლო პლატფორმა ბიზნესკურსი ახალ სასწავლო კურსს, ფინანსებზე ხელმისაწვდომობას, გთავაზობს, რომლის ერთ-ერთი გაკვეთილი მოლოდინების მართვას ეთმობა.
თუკი ბიზნესსაქმიანობა უკვე წამოწყებული გაქვს, ფინანსების მოზიდვასთან შეხება აუცილებლად გექნებოდა — შენ ხომ საწყისი კაპიტალი დაგჭირდა. სხვა საქმეა დამატებითი კაპიტალის მოზიდვა, რომელსაც სხვა შესაძლებლობები და რისკები ახლავს თან. ამდენად, აუცილებელია, ზუსტად იცოდე, რისთვის გჭირდება დამატებითი კაპიტალი და რა სარგებელს მიიღებ მისით. სწორედ ამის გარკვევაში დაგეხმარება ფინანსებზე ხელმისაწვდომობის კურსი.
რას ისწავლი კურსის ფარგლებში
ფინანსებზე ხელმისაწვდომობის კურსი აუდიტორული და საკონსულტაციო კომპანია Loialte-ს მმართველი პარტნიორისა და მცირე და საშუალო მეწარმეობის განვითარების ასოციაცია SMEDA-ის ხელმძღვანელის, გიგა ფაიქიძის, მომზადებულია. 8 გაკვეთილისგან შემდგარი კურსი განკუთვნილია არა მხოლოდ ახალბედა მეწარმეებისთვის, არამედ მათთვისაც, ვინც საკუთარი ბიზნესის გასავითარებლად ახალ გზებს და შესაძლებლობებს ეძებს.
კურსის ფარგლებში გაიგებ, რატომ სჭირდება შენს ბიზნესს დამატებითი კაპიტალი და რა სახის ფინანსების მოზიდვა შეგიძლია. მიიღებ რჩევებსაც: როდის არის რეკომენდებული დამატებითი კაპიტალის მოზიდვა და ღირს თუ არა ფინანსების მოზიდვის მიზნით ბიზნესში წილის დათმობა. გარდა ამისა, კურსი გასწავლის, როგორი უნდა იყოს ბიზნესი, რომ ადვილად მოიზიდოს კაპიტალი და როგორ უნდა მართო მოლოდინები შესაბამისად.
ამდენად, თუ ახლა შენი ბიზნესისთვის არცთუ სახარბიელო პერიოდია, ან ფიქრობ, რომ ჩიხში მოექეცი, ფინანსების ხელმისაწვდომობის კურსი მაშველი რგოლიც კი შეიძლება აღმოჩნდეს. ის მდგომარეობის უკეთ შეფასებაში დაგეხმარება და გადაწყვეტილების მიღებასაც გაგიმარტივებს.
რატომ არის საჭირო ფინანსების მოზიდვის ხერხების ცოდნა
ბიზნესი არასახარბიელო სიტუაციაში სხვადასხვა მიზეზის გამო შეიძლება აღმოჩნდეს. შესაძლოა, ეს შენგან დამოუკიდებელი ფაქტორით, მაგალითად, გლობალური პანდემიით იყოს განპირობებული. თუმცა, ზოგჯერ პრობლემის ძიება „საკუთარ თავში“ გიწევს.
ასე რომ, დამატებითი კაპიტალის მოზიდვაც სხვადასხვა მიზეზით/მიზნით შეიძლება დაგჭირდეს: შესაძლოა, მოგების კლების ტენდენციას ამჩნევ, თანამშრომლებისთვის ანაზღაურების მიცემა გიჭირს, შენი პროდუქტი/სერვისი კონკურენტუნარიანობას კარგავს, გაუთვალისწინებელი ხარჯები დაგემატა ან სულაც ბიზნესის გაფართოებას აპირებ.
მოკლედ, როგორც იტყვიან, ბიზნესში ყველაფრისთვის მზად უნდა იყო. მზადყოფნა კი, პირველ რიგში, შესაბამისი ცოდნის ქონას გულისხმობს. როცა იცი, როგორ გაუმკლავდე წარმოქმნილ სირთულეს და აქციო ის შესაძლებლობად, ეს შენი წარმატების წინაპირობად იქცევა. ფინანსებთან ურთიერთობა კი ნამდვილად ისწავლება, ასე რომ, ბიზნესკურსის ახალი კურსის გავლაც შენი ბიზნესის წარმატების წინაპირობად შეგიძლია ჩათვალო.
რა არის ბიზნესკურსი და კიდევ რას გთავაზობს ის
საქართველოს ბანკის შექმნილი პლატფორმა ბიზნესკურსი სხვადასხვა თემატიკის ათობით უფასო სასწავლო კურსსა და მასტერკლასს უყრის თავს. მისი საშუალებით შეიძენ თანამედროვე ბიზნესის სამართავად საჭირო ცოდნასა და უნარებს. ბიზნესკურსი დაგეხმარება, დაგეგმო და განახორციელო ყველა ნაბიჯი ბიზნესის იდეიდან გამართულ მარკეტინგამდე. პლატფორმა მოიცავს სამეწარმეო საქმიანობის თითქმის ყველა ასპექტს: გაყიდვებს, მომსახურების მენეჯმენტს, ბუღალტერიას, რეკლამირებას, ადამიანური რესურსების მართვას და სხვა. საგულდაგულოდ შედგენილ სასწავლო კურსებს კი სხვადასხვა სფეროს წამყვანი სპეციალისტები უძღვებიან.
ბიზნესკურსის შესახებ მეტის გაგებასა და პლატფორმაზე რეგისტრაციას ვებგვერდზე შეძლებ.