500 Georgia-ის აქსელერაციის პროგრამა დაბრუნდა. საქართველოს ბანკთან და ინოვაციებისა და ტექნოლოგიების სააგენტოსთან თანამშრომლობით, სილიკონ ველიზე დაფუძნებული ვენჩურული საინვესტიციო კომპანია 500 Global თავის ცნობილ პროგრამას ჩვენს ქვეყანაში უკვე მეხუთედ ახორციელებს.
პროგრამა, რომელიც მიზნად ისახავს სტარტაპ ბიზნესების განვითარებას და მათ საერთაშორისო ბაზრამდე გაფართოებას, წელს ხუთი სხვადასხვა ქვეყნიდან 10 ბრენდს გააერთიანებს. ისინი სამი თვის განმავლობაში მსოფლიოს წამყვან მენტორებთან გაივლიან გადამზადების ინტენსიურ კურსს და გახდებიან 500 Global-ის საერთაშორისო ქსელის წევრები.
აუცილებლად დაგაინტერესებდათ, ვინ არიან პროგრამის მენტორები და რას შესთავაზებენ ისინი პროგრამის მონაწილეებს. ამაზე ქვემოთ მოგიყვებით.
პედრო სანტოს ვიეირა
პორტუგალიელ მეწარმესა და მენტორს, პედრო სანტოს ვიეირას, ტექინდუსტრიასთან მრავალწლიანი გამოცდილება აკავშირებს. იგი 500 Georgia-ის პროგრამის ხელმძღვანელი და 500 Global-ის პარტნიორია.
კალიფორნიის უნივერსიტეტში გარემოსდაცვითი ინჟინერიის დოქტორის ხარისხის მიღების შემდეგ, პედრო კვლევით საქმიანობაში ჩაერთო და აქტიურად აქვეყნებდა პუბლიკაციებს. მოგვიანებით, ბიზნესსაქმიანობის წამოწყება გადაწყვიტა და ჯერ შექმნა, შემდეგ კი გაყიდა ციფრული ჯანდაცვის კომპანია. ამის მერე ვიეირა ინვესტირებაზე გადაერთო და ინოვაციური ბრენდების მმართველი პარტნიორი გახდა. ამდენად, მან სხვადასხვა პოზიციაზე მყოფმა გაიარა ყველა საფეხური სტარტაპის იდეიდან გაზრდამდე. სამეწარმეო სფეროში მიღებულმა მრავალწლიანმა და მრავალფეროვანმა გამოცდილებამ, ანალიტიკურმა და მენეჯერულმა უნარებმა კი იგი გამორჩეულ და ნებისმიერი ბრენდისთვის სასურველ კონსულტანტად აქცია.
ჯუსტინა იასტჟებსკა
16-წლიანი საქმიანობის განმავლობაში ჯუსტინა ბევრ ბიზნესს დახმარებია ზრდაში, წარმატებული პროდუქტების გამოშვებასა და ვებარხების ოპტიმიზაციის ეფექტური სტრატეგიების შემუშავებაში. იგი ხშირად იყენებს ეგრეთ წოდებული ემოციური თარგეთინგის მეთოდს, რომელიც გაყიდვების ზრდის მიზნით მომხმარებელთან ძლიერი ემოციური კავშირის დამყარებას გულისხმობს. ეს კი, როგორც ჯუსტინას გამოცდილებაც მოწმობს, კომპანიების ზრდაზე სასიკეთოდ აისახება. მაგალითისთვის, კომპანია Mindvalley-მ, რომლის განვითარებასაც ჯუსტინამ ექვსი წელი მიუძღვნა, ყოველწლიური შემოსავალი $300 ათასიდან $20 მილიონამდე გაზარდა.
ბოლო ხუთი წლის განმავლობაში ჯუსტინა აქტიურადაა ჩართული სხვადასხვა აქსელერაციის პროგრამაში მთელი მსოფლიოს მასშტაბით. პროგრამების საშუალებით მარკეტერმა 900 სტარტაპის წარმატებაში შეიტანა მნიშვნელოვანი წვლილი.
ტიმურ დაუდპოტა
ტიმური თავადაც 500 Global-ის მონაწილე იყო და მიღებულ გამოცდილებასა და ცოდნას ახლა უკვე სხვა სტარტაპებს უზიარებს. მისი გამოცდილება კი ისეთ ცნობილ კომპანიებთან თანამშრომლობებს მოიცავს, როგორიცაა კოკა-კოლა, ბურგერ კინგი და დისნეი. ამასთან, ტიმური მუშაობდა ცნობილი გამოცემებისთვისაც: Time, Vogue, PBS და კიდევ ბევრი სხვა. იგი აქცენტს აკეთებს B2B გაყიდვების მოდელზე, რაც ზემოხსენებული კომპანიების შემთხვევაში კომერციულად ძალიან წარმატებული გამოდგა.
500 Global-ის პროგრამის ფარგლებში ტიმურმა შეიძინა ახალი უნარები და ცოდნა პროდუქტისა და ბრენდის ზრდის მიმართულებით. კარიერის განმავლობაში იგი 800-ზე მეტ სტარტაპს დახმარებია განვითარებაში, ბევრ რეგიონში კი სტარტაპ-ეკოსისტემის შექმნაშიც მიიღო მონაწილეობა.
ვადიმ როგოვსკი
უკრაინელი ტექანტრეპრენერი და ინვესტორი ვადიმ როგოვსკი საკუთარ ინოვაციურ კომპანიას 3DLOOK-საც მართავს და ახალბედა ამერიკული ბრენდის, Geek Ventures, პარტნიორიც გახლავთ. ეს უკანასკნელი, თავის მხრივ, ინვესტირებას ახორციელებს ემიგრანტების დაფუძნებულ სტარტაპებში და ეხმარება მათ, გახდნენ სფეროს ლიდერები. ვადიმი ასევე არის 500 Global-ის მენტორი და Forbes-ის გამოცემის კონტრიბუტორი. 3DLOOK-ით კი მან სამეწარმეო ინდუსტრიის ერთ-ერთი ყველაზე პრესტიჟული პრიზი, LVMH Innovation-ის ჯილდო, მოიპოვა.
რომელი სტარტაპერი იტყოდა უარს ასეთ მენტორებთან კომუნიკაციაზე და მათგან რჩევების მიღებაზე? აი, 500 Global-ის წარმატებაზე კი შთამბეჭდავი რიცხვებიც მეტყველებს: $2,4-მილიარდიანი აქტივები, 2 800-ზე მეტი ბენეფიციარი კომპანია 80-ზე მეტი ქვეყნიდან და, მათ შორის, 35-ზე მეტი კომპანია, რომელთა ღირებულება $1 მილიარდს აჭარბებს.
500 Georgia-ის მიზანია, დაეხმაროს ახალბედა კომპანიებს ადგილის მყარად დამკვიდრებაში, როგორც რეგიონის მასშტაბით, ასევე გლობალურ ბაზარზე. ამ მიზნით, პროგრამის ფარგლებში მონაწილეები ბიზნესის განვითარების, ზრდისა და დაფინანსების მოპოვების სტრატეგიებზე იმუშავებენ, მიიღებენ ფასდაუდებელ ცოდნას საინვესტიციო მიმართულებით. აქსელერაციის აქტიურ პროცესში ჩართული სტარტაპები მომდევნო სამი თვის განმავლობაში საკუთარ პროექტებს დემო დღეზეც წარადგენენ და ინოვაციურ ხედვებს ფართო საზოგადოებას გააცნობენ, რაც მათ კიდევ უფრო მასშტაბური შესაძლებლობებისკენ გაუხსნის გზას.