NASA Space Apps Challenge მსოფლიოში ერთ-ერთ ყველაზე მასშტაბური ჰაკათონია, რომელიც სხვადასხვა ქვეყანაში ყოველწლიურად ტარდება. პროექტი 300 ქალაქს მოიცავს და 1000-მდე მონაწილეს აერთიანებს.
NASA Space Apps Challenge-ის მთავარი პარტნიორი საქართველოში წელს საქართველოს ბანკია. ორდღიანი ღონისძიება 7-8 ოქტომბერს GITA-ში გაიმართება. წელს პროექტში მონაწილეობის სურვილი 100-ზე მეტმა გუნდმა გამოთქვა, რომელთაგანაც შეირჩა 30-მდე გუნდი ჰაკათონში ჩასართავად. თუმცა პროექტს არც დანარჩენი მსურველები გამოეთიშებიან, ისინი ვირტუალურად შეძლებენ ვორქშოპებზე დასწრებას.
პროექტი განკუთვნილია მათთვის, ვისაც აინტერესებს პროგრამირება, სთორითელინგი, დიზაინი, ტექნოლოგიები, ასტროფოტოგრაფია და ინოვაციები. მონაწილეები დაიყოფიან გუნდებად, გუნდი მაქსიმუმ 6 ადამიანისგან შეიძლება შედგებოდეს, თუმცა შესაძლებელია ინდივიდუალურად მონაწილეობა. გუნდები ორი დღის განმავლობაში იმუშავებენ ნასასა და მსოფლიოს მთავარი კოსმოსური ცენტრებისგან მიღებულ რეალურ მონაცემებზე, შეიმუშავებენ გლობალური პრობლემების გადაწყვეტის საკუთარ, ინოვაციურ გზას.
გარდა გუნდური შეჯიბრებისა, კონკურსის განმავლობაში მონაწილეებს შესაძლებლობა ექნებათ დაესწრონ ვორკშოპებს სასურველ თემებზე: მონაცემთა მეცნიერება, ასტროფოტოგრაფია, პროტოტიპირება , UI/UX დიზაინი. ვორკშოპებს წარუძღვებიან დარგის წამყვანი სპეციალისტები, პროექტის ფარგლებში მონაწილეები შემდეგ ვორქშოპებს დაესწრებიან:
- მონაცემთა მეცნიერების საფუძვლები – რუდოლფ ერემიანი, მონაცემთა მეცნიერი, Toptal;
- პროტოტიპირება – რუსო ჩაჩანიძე, Medialab-ის ხელმძღვანელი; ლუკა კაკაბაძე, აქსელერაციის პროგრამის ხელმძღვანელი, Medialab;
- Introduction to Large Language Models – გიორგი ჯვარიძე, MaxinAI-ის თანადამფუძნებელი და ინჟინერიის დირექტორი;
- მითები Software Engineering-ზე – მერაბ/ტატო კუტალია – Google-ის ანდროიდ დეველოპერ ექსპერტი;
- ასტროფოტოგრაფია – სანდრო შუღლაძე, ასტროფოტოგრაფი;
- UI/UX დიზაინის საფუძვლები – ნიკ ოსიპოვი, დიზაინერი, სმარტ აკადემიის ლექტორი.
ღონისძიების ბოლოს პროფესიონალებისგან შემდგარი ჟიური კონკურსში მონაწილე გუნდებისგან შეარჩევს საუკეთესოს, შერჩეული გუნდი სპეციალური პრიზით დასაჩუქრდება და რაც მთავარია, მიიღებს უნიკალურ შესაძლებლობას საკუთარი იდეა წარადგინოს NASA Space Apps Challenge-ის გლობალურ კონკურსზე.
2022 წელს ნასას გლობალურ პროექტში მსოფლიოს სხვადასხვა ქვეყნიდან 10 გამარჯვებული გუნდი გამოვლინდა, გუნდებმა პრიზები სხვადასხვა კატეგორიაში მოიგეს. ტაივანის გუნდმა მიიღო პრიზი ტექნოლოგიის შემუშავებისთვის, რომელიც მზის ქარიშხლის პროგნოზირებისთვის გამოიყენება. ხელოვნებისა და ტექნოლოგიების კატეგორიაში პრიზი მიიღო მასაჩუსეტსის გუნდმა, მათ შექმნეს მოწყობილობა, რომელიც ინტერაქციული და კრეატიული გზით ხსნის კოსმოსურ ამინდს და მის გავლენას დედამიწაზე.
კონკურსში მონაწილეობა სრულიად უფასოა, მთავარია, გქონდეს ინტერესი და მოტივაცია, შენი იდეები კოსმოსურ, გლობალურ პრობლემებს დაუპირისპირო.
NASA Space Apps Challenge ხელმისაწვდომია ყველასთვის, ვისაც უყვარს მეცნიერება და აქვს ინოვაციური იდეები, პროექტის მიზანია მსოფლიო მასშტაბით პერსპექტიული ახალგაზრდების პოვნა და მათი შესაძლებლობების პლანეტისთვის სასარგებლოდ გამოყენება. გუნდში რეალურ მონაცემებზე მუშაობისას და ვორქშოფებზე დასწრებისას დიდ გამოცდილებას იღებ, ამიტომ აუცილებლად უნდა სცადო ბედი მაშინაც კი, თუ ფიქრობ, რომ განსაკუთრებული არ ხარ. შესაძლოა შენი პატარა და მარტივი იდეა გახდეს დიდი აღმოჩენების ინსპირაცია.