ალბათ, უკვე იცით, რომ 14 და 15 ოქტომბერს ვიანის ორგანიზებითა და SOLO-ს გენერალური სპონსორობით Stamba-სა და Rooms Hotel Lab-ში ვიანის ჯანმრთელობაზე ზრუნვის სამიტი გაიმართება. სამიტის მთავარი იდეა ჯანმრთელობაზე ზრუნვით დაინტერესებული ადამიანების გაერთიანება და ჰოლისტური ზრუნვის შესახებ ცნობიერების ამაღლებაა, თუმცა, რა ფორმით მოხდება ეს ყველაფერი და როგორ – ამას დეტალურად ქვემოთ გაიგებთ.
სტრესი, შენი გონება და განსხვავება „ჩვენსა“ და „მათ“ შორის
სამიტის პირველივე დღე, 14 ოქტომბერი, ნეირომეცნიერ რობერტ საპოლსკის ონლაინ მოხსენებით იწყება, რომელიც დეტალურად ისაუბრებს, რა გავლენა აქვს სტრესს ჩვენს გონებაზე, გრძნობებსა თუ ცნობიერებაზე. ალბათ, ხშირად მოგისმენიათ აქამდეც, რომ ბევრი დაავადება თუ ფიზიკური დისკომფორტი სტრესისგანაა გამოწვეული; სტრესი ხომ თანამედროვე ცხოვრების განუყოფელი ნაწილია, მაგრამ გიფიქრიათ, რამდენად განსხვავებული იქნებოდა ცხოვრება, სტრესის მართვა რომ შეგვეძლოს? სწორედ ახლა გაქვთ შანსი, სათანადოდ შეაფასოთ, თუ რამხელა ზიანს აყენებს სტრესი ჩვენს ფიზიკურ თუ გონებრივ ჯანმრთელობას და ის შესაბამისი ტექნიკებიც შეისწავლოთ, რომლებიც მსგავსი გამოწვევების დაძლევაში დაგეხმარებათ.
„შენი ჯანმრთელობა შენს ხელშია. ან იქნებ, შენს გონებაში.“
ლეო მეთოდოლოგიის თანაავტორი, სამი კოენი მოგვიყვება, რა ძალა აქვს გონებრივ მოდელებს, ქცევებსა და სტერეოტიპებს ჩვენს ჯანმრთელობაზე. ის, რომ ჩვენ გონება გვმართავს, განსაკუთრებული სიახლე სულაც არ არის, თუმცა სამი დაგარწმუნებთ იმ ძალასა და შესაძლებლობებში, რაც თურმე ჩვენსავე გონებაში არსებობს და აქამდე წარმოდგენაც არ გვქონდა ამის შესახებ.
რა მოუვიდა ბედნიერებას?
აქამდე გიფიქრიათ, რამდენად ბედნიერი ხართ? ან, რამდენად ბედნიერები არიან ადამიანები თქვენ გარშემო? ბედნიერების ინდექსი სხვადასხვანაირად იზომება, ყველასთვის ინდივიდუალური და უნიკალური შეგრძნებაა, თუმცა თუ კარგად დააკვირდებით, აღმოაჩენთ, რომ ბედნიერების შეგრძნება სადღაც გაქრა, მაგრამ არავინ იცის, სად ან რატომ…ფსიქოლოგი თამარ თანდაშვილი სწორედ ამ თემაზე ისაუბრებს – რამ განაპირობა თანამედროვე ცხოვრებაში ბედნიერების შეგრძნების გაქრობა და შეგვიძლია კი ამის გამოსწორება?
მენტალური ჯანმრთელობის გამოწვევები
რა თქმა უნდა, ჯანმრთელობაზე ზრუნვის სამიტის ერთ-ერთი მთავარი მიმართულება მენტალური ჯანმრთელობა და მისი გავლენაა ჩვენს ყოველდღიურ ცხოვრებაზე – თანამედროვეობის ერთ-ერთი მთავარი გამოწვევა ხომ სწორედ ესაა. სწორედ ამიტომ, 14 ოქტომბერს საერთაშორისო ექსპერტები ქართველ ფსიქოლოგ-სპეციალისტებთან ერთად ისაუბრებენ ისეთ მნიშვნელოვან საკითხებზეც, როგორებიცაა: რატომ გახშირდა თინეიჯერულ ასაკში მენტალური ჯანმრთელობის პრობლემები, რა მნიშვნელობა ენიჭება ფსიქიატრიაში ადრეულ ეტაპზე დასმულ დიაგნოზს, რა იწვევს დამოკიდებულებებს, რა არის ემოციური კვება და როგორია თანამედროვე ადამიანის ფსიქო-სოციალური პორტრეტი – როგორ უნდა გავუმკლავდეთ მენტალურ პრობლემებს დღევანდელ გარემოში.
სამიტზე სულ 67 სპიკერი გამოვა და 10 მასტერკლასი გაიმართება. დეტალურ ინფორმაციას შეგიძლიათ გაეცნოთ აქ. დასასწრები ბილეთების შეძენა კი ამ ბმულზეა შესაძლებელი.