საქართველოს ბანკმა პირველი კონკურსი 2020 წელს გამოაცხადა ნიკა გუჯეჯიანის სახელობის სტიპენდიის მოსაპოვებლად და მსოფლიოს ერთ-ერთ ყველაზე ცნობილ კრეატიულ სკოლაში – Miami Ad School EU-ში უფასოდ სასწავლებლად. სულ ცოტა ხნის წინ გამოვლინდა 2023 წლის გამარჯვებული, სოფი ივანიშვილი, რომელიც 160 კანდიდატიდან შეირჩა და მალე ბერლინში გააგრძელებს სწავლას Art Direction-ის მიმართულებით.
აქამდე განვლილ გზაზე თავად სოფი გვიამბობს:
“Miami Ad School რა იყო და სად იყო, პირველად დაახლოებით 6 წლის წინ გავიგე, როცა ჩემმა მეგობარმა ლევანმა დიდი რუდუნებით შეავსო აპლიკაცია, მოამზადა დავალებები და ჰამბურგში გაემგზავრა Art Direction-ის სასწავლად. მერე რამდენიმე წელი ლევანის და სხვების თავგადასავლების, შთაბეჭდილებების და აღმაფრთოვანებელი გამოცდილებების სმენის გავლენით არაერთხელ გავხსენი სკოლის ვებგვერდი, აპლიკაციის ფორმაც რამდენჯერმე შევავსე, ყველა ჯერზე “დავაკლიკე” ინტერნეტში შემომხვდარ ვებბანერს თუ პრეროლს, ნიკა გუჯეჯიანის სტიპენდიასაც ყოველ წელს გაფაციცებით ველოდე, მაგრამ ბოლო წუთს ვერც ერთხელ გავბედე “send” ღილაკზე დაჭერა… 2023 წლის ივნისამდე.
მაშინ, როცა კრეატიულ ინდუსტრიაში ამოვყავი თავი, ჩვენს ქვეყანაში არც ისე მარტივი იყო ამ სფეროში განათლების მიღება. პროფესიით ფსიქოლოგმა, უნივერსიტეტიდან პირდაპირ “Leavingstone”-ში შევაბიჯე კონტენტ კრეატორის პოზიციაზე, შებიჯებისთანავე მივხვდი, რომ წინ დიდი თავგადასავალი მელოდა. შემდეგ Saatchi & Saatchi Tbilisi-ში გავაგრძელე ქოფირაითერად მუშაობა, ორი წლის მერე კი Windfor’s Tbilisi-ს გუნდის წევრი გავხდი და დღემდე უფროსი ქოფირაითერი გახლავართ.
უამრავი მოწონებული თუ დაწუნებული იდეის, უსასრულოდ გრძელი პრეზენტაციების, გადაღებებზე გათენება-დაღამების, კონკურსებზე ნერვიულობების და მღელვარე “ბრეინშტორმნიგების” მერე, კრეატივი ჩემი ცხოვრების უდიდესი ნაწილი გახდა. რაც თავი მახსოვს, ამბებით, იდეებით და მიგნებებით ვიყავი აღფრთოვანებული და უცებ აღმოვჩნდი გარემოში, სადაც სხვებსაც ზუსტად ისე ენთებოდათ თვალები და მოუსვენრად იწყებდნენ ცქმუტვას საინტერესო იდეის მოსმენის დროს, როგორც მე. გავიცანი საოცრად ნიჭიერი ადამიანები და ვიპოვე მეგობრები, თანამოაზრეები, რომლებიც ჩემი ცხოვრების უძვირფასესი შენაძენები არიან.
ჩემი პროფესიაც ამ ადამიანების სმენით და მათთან ერთად მუშაობით “შემომესწავლა”. მიუხედავად იმისა, რომ იდეების სიტყვებად ქცევა და ამბების ტექსტებად მოყოლა ჩემი ერთ-ერთი ყველაზე საყვარელი საქმიანობაა, კარგა ხანია ვიზუალური “სთორითელინგიც” ჩამივარდა გულში – დიდ დროს ვუთმობდი ფოტოგრაფიას, ვიდეოგრაფიას და ჩუმ-ჩუმად “ბრიფებს” არტ დირექტორის თვალითაც ვუმზერდი ხოლმე. სწორედ ამ მიმართულებით განვითარებისთვის ვოცნებობდი Miami Ad School EU-ს Art Direction-ის პროგრამაზე სწავლას. ნიკა გუჯეჯიანის სტიპენდიამ კი ეს უდიდესი სურვილი რეალობად აქცია.
ისეთი პატარა და ახალგაზრდა სფეროსთვის, როგორიც ქართული კრეატიული ინდუსტრიაა, ამგვარი წახალისებები სასიცოცხლოდ მნიშვნელოვანია. სწავლა ადამიანებისგან, რომლებიც ამ საქმეს უამრავი წელია აკეთებენ და ისეთ პროექტებზე უმუშავიათ, რომლებიც კანის ლომებს და მსგავს პრესტიჟულ ჯილდოებს იგებენ; სტაჟირება მსოფლიოს სამი სხვადასხვა ქვეყნის წამყვან სააგენტოში; საკუთარი თავის გამოცდა უცხო და სტრესულ გარემოში – ეს არის უნიკალური შანსი, დააგროვო შეუფასებელი გამოცდილება და განვითარდე საკუთარი შესაძლებლობების მაქსიმუმზე. თუმცა დიდი პასუხისმგებლობაცაა და პატარ-პატარა შიშებიც ახლავს თან, რომლებისაც ერთი სული მაქვს, როდის გავუსწორებ თვალს.
იანვრიდან ბერლინში Art Direction-ს ვისწავლი მსოფლიოს ერთ-ერთ საუკეთესო სკოლაში და პატარა სოფის, ეკრანზე გახსნილ აპლიკაციას რომ უყურებდა გაფართოებული თვალებით, მინდა ვუთხრა, რომ ყველაფერი გამოდის – ზუსტად მაშინ, როცა მზად ხარ“.
საქართველოს ბანკი Miami Ad School Europe-თან ერთად უკვე 4 წელია, ქმნის შესაძლებლობას ნიჭიერი ახალგაზრდებისთვის, რომ მოიპოვონ 100%-იანი დაფინანსება და ისწავლონ ბერლინში, მსოფლიოს საუკეთესო კრეატიულ სკოლაში 2-წლიან პორტფოლიო პროგრამაზე. კონკურსი მომავალ წელსაც გამოცხადდება და შეიძლება შემდეგი გამარჯვებული შენ იყო.