ბიზნესკურსი: გაიგე, როგორ უნდა შექმნა ეფექტური ვიდეო კონტენტი

მცირე ბიზნესს ფლობ ან ახლა აპირებ სამეწარმეო საქმიანობის წამოწყებას? მაშინ აუცილებლად დაფიქრდებოდი იმაზეც, როგორ მისწვდე შესაბამის აუდიტორიას და გააცნო საკუთარი პროდუქტი. ამისათვის ერთ-ერთი საუკეთესო გზა ეფექტური ვიდეო კონტენტის შექმნაა.

ბოლო წლებში, განსაკუთრებით მას შემდეგ, რაც სოციალურმა ქსელმა TikTok-მა პოპულარობა მოიპოვა, ვიდეო ამბის მოყოლის ყველაზე მოსახერხებელ საშუალებად იქცა. TikTok-ის გარდა, გამოჩნდა უამრავი პლატფორმაც, რომელიც ადამიანებს შთამბეჭდავი ნამუშევრის შექმნაში ეხმარება. ამდენად, ვიდეო კონტენტის წარმოება უფრო ადვილიც გახდა. თუმცა, შემქმნელებისთვის ახლა მთავარი გამოწვევა უნიკალური კონტენტის შექმნაა, რათა ვიდეოების ამ ზღვაში მომხმარებელს თავი დაამახსოვრონ.

აი, სწორედ ამიტომ, საქართველოს ბანკმა თავის საგანმანათლებლო პლატფორმა ბიზნესკურსზე საგანგებოდ დაამატა ვიდეო კონტენტის შექმნის მასტერკლასი.

ვიდეო კონტენტის შექმნის მასტერკლასი სამ ძირითად საკითხზე მოგაწვდის ამომწურავ ინფორმაციას: რა რესურსი გჭირდება ვიდეო კონტენტის შესაქმნელად, როგორ მოარგო კონტენტი TikTok-ის ალგორითმს და როგორ გაზარდო პროდუქტის ცნობადობა Facebook-ისა და Instagram-ის მეშვეობით.

ასე რომ, ვიდეო კონტენტის მასტერკლასის გავლის შედეგად იმ „გასაღებებს“ დაუფლები, რომლებიც სოციალური მედიის არხების ეფექტურად გამოყენებაში დაგეხმარება. გაიგებ, როგორ მუშაობს მათი ალგორითმები, როგორ უნდა მიუდგე თითოეულ მათგანს და, რაც მთავარია, რა შეცდომები არ უნდა დაუშვა.

მასტერკლასი ისეთი საბაზისო უნარების დაუფლებაშიც დაგეხმარება, როგორიცაა სათანადო აღჭურვილობის და განათების გამოყენება, მუშაობა სამონტაჟო პროგრამებში და სხვა.

მაღალი ხარისხის ვიდეო კონტენტის შექმნა ნებისმიერი ზომისა და მიმართულების მქონე ბიზნესისთვის წარმატების ერთ-ერთი წინაპირობაა. როგორც დასაწყისშივე აღვნიშნეთ, მულტიმედია ტექნოლოგიების ეს მეთოდი ბოლო პერიოდში „სთორითელინგის“ ყველაზე აქტიურ და ეფექტურ საშუალებად მიიჩნევა. ვიდეოების დახმარებით, უფრო ადვილადაც იპოვი მომხმარებელს და უკეთაც წარუდგენ საკუთარ პროდუქტს მას.

აი, მაგალითად, ვიდეო კონტენტის წარმოების პლატფორმა WYZOwl-ის ცნობით, ადამიანთა 88 პროცენტი ამბობს, რომ კონკრეტული პროდუქტის ან სერვისის მომხმარებელი სწორედ მასზე გადაღებული ვიდეოს ყურების შემდეგ გახდა. ამავე წყაროს მიხედვით, მარკეტერების 92 პროცენტი ვიდეო კონტენტს სტრატეგიის მნიშვნელოვან ნაწილად მიიჩნევს, 94 პროცენტი კი ირწმუნება, რომ ვიდეოს დახმარებით მომხმარებლამდე სათქმელი უფრო ადვილად მიაქვს.

მართალია, ვიდეო კონტენტის წარმოება უფრო და უფრო ადვილი ხდება, მაგრამ საჭირო ცოდნისა და უნარების გარეშე რთულია, სასურველ შედეგს მიაღწიო. უნდა გაითვალისწინო ისიც, რომ სოციალური მედიის ყველა პლატფორმას, იქნება ეს Facebook, Instagram თუ TikTok, სხვადასხვაგვარი ალგორითმი აქვს და ერთი მიდგომა ყველასთან ვერ გაამართლებს. აი, სწორედ ამიტომაა ბიზნესკურსის ვიდეო კონტენტის მასტერკლასის გავლა მომგებიანი.

საქართველოს ბანკის შექმნილი პლატფორმა ბიზნესკურსი სხვადასხვა თემატიკის ათობით უფასო სასწავლო კურსსა და მასტერკლასს უყრის თავს. მისი საშუალებით  შეიძენ თანამედროვე ბიზნესის სამართავად საჭირო ცოდნასა და უნარებს. ბიზნესკურსი დაგეხმარება, დაგეგმო და განახორციელო ყველა ნაბიჯი ბიზნესის იდეიდან გამართულ მარკეტინგამდე. პლატფორმა მოიცავს სამეწარმეო საქმიანობის თითქმის ყველა ასპექტს: გაყიდვებს, მომსახურების მენეჯმენტს, ბუღალტერიას, რეკლამირებას, ადამიანური რესურსების მართვას და სხვა. საგულდაგულოდ შედგენილ სასწავლო კურსებს კი სხვადასხვა სფეროს წამყვანი სპეციალისტები უძღვებიან.

ბიზნესკურსის შესახებ მეტის გაგებასა და პლატფორმაზე რეგისტრაციას ვებგვერდზე შეძლებ.