საქართველოს ბანკი, როგორც რეგიონის წამყვანი ფინანსურ-ტექნოლოგიური ინსტიტუტი, ციფრულ ტრანსფორმაციას განაგრძობს. ამიერიდან, ამ პროცესში მსოფლიოს ერთ-ერთი უმსხვილესი კომპანიის, ამერიკული Amazon-ის შვილობილი AWS-იც ჩაერთვება, რომელიც ქლაუდ-სერვისების მიმწოდებელი უდიდესი კომპანიაა მსოფლიოში. AWS-თან ღრმა და ყოვლისმომცველი თანამშრომლობა მოიაზრებს როგორც საქართველოს ბანკის IT-ინფრასტრუქტურის AWS-ის ქლაუდზე მიგრაციას და შედეგად, ბანკის ოპერაციების გაციფრულებას, ასევე საქართველოს ბანკის თანამშრომლების გადამზადებას და გლობალურ ტექნოლოგიურ ინდუსტრიაში არსებული უახლესი ტენდენციების მათთვის გაცნობას.
ამ მიზნით, გასულ კვირას თბილისში იმყოფებოდა AWS-ის ტექნოლოგიური დირექტორი ცენტრალურ და აღმოსავლეთ ევროპაში, ახლო აღმოსავლეთსა და აფრიკაში, ტომაშ სტაჩლევსკი, რომელიც საქართველოს ბანკის თანამშრომლებს შეხვდა და მათ AWS-ისა და საქართველოს ბანკის თანამშრომლობის შესახებ მოუყვა.
“საქართველოს ბანკისა და AWS-ის თანამშრომლობის ფარგლებში, ბანკი ჩვენს პორტფელში შემავალ ქლაუდ-სერვისებზე წვდომას მიიღებს, რითაც კომპანია შეძლებს საკუთარ მომხმარებლებს ულტრათანამედროვე გადაწყვეტები შესთავაზოს და თან, ისეთი სერვისები დანერგოს, რომელთა გამოყენება, ამ დრომდე, რთული და არამომგებიანი იყო – საუბარია ბლოკჩეინზე, მანქანურ დასწავლაზე, ხელოვნურ ინტელექტსა და Serverless-ზე”, – აღნიშნავს ტომაშ სტაჩლევსკი და დასძენს, რომ თანამშრომლობის ფარგლებში, AWS-ი საქართველოს ბანკისთვის იქნება არა უბრალო ვენდორი, არამედ პარტნიორი, რომელიც ქართულ კომპანიას საკუთარ გამოცდილებას და მსოფლიოში არსებულ საუკეთესო პრაქტიკებს გაუზიარებს.
“კომერციული შეთანხმებისა და მიგრაციის დაჩქარების პროგრამის (MAP) ამოქმედება Amazon Web Service-სა და საქართველოს ბანკს შორის დაწყებული ურთიერთობის პირველი, მაგრამ ძალიან მნიშვნელოვანი ნაბიჯია. AWS-ის გამოყენება კომპანიებს თვითმომსახურების გზითაც შეუძლიათ, რაც ნიშნავს, რომ ხშირად, ქლაუდ-პლატფორმას კომპანიები ჩვენთან კომუნიკაციის გარეშე იყენებენ. თუმცა საქართველოს ბანკთან გაფორმებული ხელშეკრულებებით, ჩვენი ურთიერთობა საბაზისო თანამშრომლობის მასშტაბებს გასცდება. AWS-ი საქართველოს ბანკს ქლაუდზე მიგრაციის სტრატეგიების შესახებ მრავალწლიან გამოცდილებას გაუზიარებს, რომელიც AWS-მა ათასობით კომპანიასთან ურთიერთობით დააგროვა. AWS-ის ხელსაწყოების გამოყენებით, საქართველოს ბანკი ხარჯებს შეამცირებს და ავტომატიზაციის დახმარებით, ტექნოლოგიურ ტრანსფორმაციას დააჩქარებს”, – ამბობს AWS-ის ტექნოლოგიური დირექტორი.
ტექნიკურ დახმარებასთან ერთად, რომელიც საქართველოს ბანკს საკუთარი IT-ინფრასტრუქტურის AWS-ის სერვისებზე გადასაწყობად სჭირდება, ორი კომპანიის თანამშრომლობა საქართველოს ბანკის თანამშრომლების კვალიფიკაციის ამაღლებასაც გულისხმობს. პროცესი, რომელშიც თავად AWS-იც ჩაერთვება, სხვადასხვა სახის სემინარებსა და სამუშაო შეხვედრებს გულისხმობს, რომელთა ფარგლებში, საქართველოს ბანკის თანამშრომლები უკეთ გაიცნობენ იმ ქლაუდ-სერვისებსა და ხელსაწყოებს, რომელთაც მათ AWS-ი სთავაზობს.
“თავდაპირველად, საქართველოს ბანკის თანამშრომლებთან გაცნობით შეხვედრებს გავმართავთ, რათა AWS-ის ქლაუდ-ტექნოლოგიების გამოყენება გუნდებმა მაქსიმალურად ეფექტიანად შეძლონ. არ გვსურს, საქართველოს ბანკისთვის უბრალო ვენდორები ვიყოთ, პირიქით – წელს, მომავალ წელს და მომდევნო ათი წლის განმავლობაში ერთმანეთს პარტნიორებად აღვიქვამთ. ამისთვის კი, მნიშვნელოვანია თანამშრომლებმა ჩვენი კომპანიის საუკეთესო პრაქტიკები გაითავისონ. ამასთან, მნიშვნელოვანია რომ გადაწყვეტები და სისტემები, რომელთაც საქართველოს ბანკში ქმნიან იყოს არამხოლოდ გამართული და დაცული, არამედ მიყვებოდეს დღეს არსებულ საუკეთესო ტენდენციებს. პირველ რიგში, რამდენიმე განხილვას ჩავატარებთ და დავადგენთ, შექმნილია თუ არა აპლიკაციების უსაფრთხოებისა და საბიუჯეტო ეფექტიანობის უმაღლესი სტანდარტის შესაბამისად”, – ამბობს ტომაშ სტაჩლევსკი.
საქართველოს ბანკისა და Amazon Web Services-ის თანამშრომლობის უნიკალურობას განაპირობებს არამხოლოდ მასშტაბი, არამედ სიღრმეც. გამომდინარე იქიდან, რომ AWS-ი მომხმარებელზე ორიენტირებული კომპანიაა, ურთიერთობა, რომელსაც ის საქართველოს ბანკს ჰპირდება – ორმხრივია, რაც ქართულ კომპანიას და მის თანამშრომლებს უწყვეტი განვითარების საშუალებას მისცემს. როგორც ტომაშ სტაჩლევსკი ამბობს, მომხმარებელზე აღებული ორიენტირი აისახება ყველაფერზე, რასაც თანამშრომლობა მოიაზრებს – ახალი პროდუქტების და სერვისების დანერგვით დაწყებული და ბიუჯეტის ოპტიმიზაციით დამთავრებული.
“AWS-ი მომხმარებელზე ორიენტირებული კომპანიაა, რომელიც ოპერირებს ისე, რომ მომხმარებელს მოსწონდეს არა მხოლოდ დღეს და ხვალ, არამედ მომდევნო ათი წლის განმავლობაში. პარტნიორობის ფარგლებში, ქლაუდზე გამართული სისტემის შექმნაში დაგეხმარებით. მუდამ თქვენთან ვიქნებით და იმასაც გეტყვით, თუ იმაზე დიდ თანხას დახარჯავთ, ვიდრე AWS-ის სერვისების გამოსაყენებლად არის საჭირო. დამიჯერეთ, თუ საჭირო გახდა, დაგირეკავთ კიდეც და გეტყვით, რომ AWS-ის სერვისების გამოყენება უფრო ოპტიმალურად შეგიძლიათ”, – აღნიშნავს ტომაშ სტაჩლევსკი და დასძენს, რომ ქლაუდზე ინფრასტრუქტურის შექმნა ბევრნაირად შეიძლება და ეს თავისუფლება, კომპანიის მხარეს რჩება, რადგან მისი თქმით, საქართველოს ბანკისთვის AWS-ი არის არა ვენდორი, არამედ პარტნიორი.
AWS-ის ასეთ დამოკიდებულებას, ცხადია, განაპირობებს კომპანიის მასშტაბი და გამოცდილება. კი, AWS-ი მსოფლიოს უმსხვილესი ონლაინმაღაზიის, Amazon-ის შვილობილი კომპანიაა, მაგრამ ანალიტიკოსების ვარაუდით, რამდენიმე წელიწადში, შესაძლოა, ქლაუდი კომპანიისთვის უფრო მნიშვნელოვან მიმართულებად იქცეს. დღეს, Amazon-ის საბაზრო კაპიტალიზაცია $1.4 ტრილიონს აღემატება და ამ მაჩვენებლით, ის მსოფლიოში მეხუთე ადგილს იკავებს. არსებობს ვარაუდი, რომ დროთა განმავლობაში, მისი მასშტაბებიდან გამომდინარე, AWS-ი Amazon-ს გამოეყოფა და საფონდო ბირჟაზე დამოუკიდებელი კომპანია გახდება.
საქართველოს ბანკთან ღრმა და ყოვლისმომცველი თანამშრომლობის ფარგლებში, AWS-ის ექსპერტიზა, ხელსაწყოები და ფაქტობრივად ამოუწურავი რესურსები უკვე საქართველოშიც იქნება ხელმისაწვდომი.