ვინც ბახმაროს ერთხელ მაინც სწვევია ან გურიის ამ ულამაზესი ადგილის შესახებ სხვებისგან იცის, კურორტის ხსენებისას პირველი სწორედ დოღი მოაგონდება. ყოველი წლის 19 აგვისტოს, ფერიცვალებას, ბახმაროში დიდი თუ პატარა მდინარე ბახვისწყლისკენ მიემართება, რათა ცხენოსნების შეჯიბრს თვალი ადევნოს და თავის ფავორიტს უგულშემატკივროს. გამონაკლისი არც ეს წელია და 19 აგვისტოს ბახმაროში დოღი საქართველოს ბანკის მხარდაჭერით გაიმართება.
ბახმაროს დოღის ისტორია გასული საუკუნის 30-იანი წლებიდან იწყება. დოღში თავდაპირველად ადგილობრივი მოყვარული ცხენოსნები მონაწილეობდნენ, თუმცა კურორტის განვითარებასთან ერთად დოღიც უფრო და უფრო მასშტაბური სანახაობა გახდა. თავიდან მთელი წლის განმავლობაში ამ დღეს მხოლოდ ადგილობრივები ელოდნენ, მოგვიანებით კი ბახმაროს დოღს საქართველოს სხვადასხვა კუთხის ცხენოსნებიც შეუერთდნენ.
ბახმაროს დოღი ყოველწლიურად მდინარე ბახვისწყლის კალაპოტში იმართება, რომლის ირგვლივ შეკრებილი მაყურებელი ცხენოსნების გადაადგილებას აკვირდება. თუ რა ეტაპებისგან შედგება ბახმაროს დოღი, ვის შეუძლია მონაწილეობის მიღება და როგორი გამოცდილებაა ეს შეჯიბრი თავად ცხენოსნებისთვის, ამის შესახებ ბახმაროს თასი 2022-ის გამარჯვებული, თორნიკე თოდრია დეტალურად მოგიყვებათ:
“ბახმაროს დოღი ტრადიციული ხასიათისაა და მასში მონაწილეობის მიღება ყველას შეუძლია: როგორც მოყვარულებს, ასევე სპორტსმენებს. შეჯიბრი ცხენების ჯიშების მიხედვით კატეგორიებად არის დაყოფილი, რის მიხედვითაც სხვადასხვა გარბენი სრულდება. ასე რომ, დოღში მონაწილეობის მიღება ყველა ჯიშის ცხენს შეუძლია. ბახმაროს დოღის მთავარ შეჯიბრად მარულა ითვლება, რომლის გარბენიც დაახლოებით 5 კმ-ია. მარულაში სხვადასხვა ჯიშის ცხენს, მოყვარულ მხედრებს, სპორტსმენებს და ზოგადად, ყველას შეუძლიათ მონაწილეობა, ვისაც ამის სურვილი აქვს. ასე რომ, მარულა უფრო საინტერესო და დაძაბული შეჯიბრია. გარბენიდან გამომდინარე, მარულა სხვა შეჯიბრებზე დიდხნიანია, ცხენოსნებისთვისაც უფრო რთულია, მაყურებლისთვის კი – აზარტული”, — ამბობს თორნიკე თოდრია.
თორნიკემ გასულ წელს ბახმაროს თასი მოიპოვა, თუმცა სპორტსმენისთვის ბახმაროს დოღში ეს პირველი გამარჯვება არ ყოფილა. თორნიკე თოდრია ბახმაროს თასი 2018-ის მფლობელიცაა, ახლახან კი ოზურგეთის თასი 2023-ის გამარჯვებულიც გახდა. გარდა ამისა, ბახმაროს დოღის ცხენების შეჯიბრის სხვადასხვა კატეგორიაში თორნიკეს პირველი ადგილი არაერთხელ დაუკავებია.
“პირველად დოღს როდის დავესწარი, არც კი მახსოვს. ცხენებთან ურთიერთობა ბავშვობიდან მქონდა, მამაჩემიც ცხენოსანია და სპორტის ამ სახეობით მეც ადრეული ასაკიდან ვიყავი დაინტერესებული. რაც შეხება ბახმაროს დოღს, გაუმჯობესებული სისხლის ცხენებისა და გამოცდილი მხედრების ჩართულობის გამო დღესდღეობით სპორტული დონე გაცილებით მაღალია. შარშანდელ გამარჯვებაზე შემიძლია გითხრათ, რომ საკმაოდ დაძაბული და რთული გარბენი იყო, კონკურენტებიც მომზადებულები და საკმაოდ ძლიერები იყვნენ. ჩემი გამარჯვება კი დაუღალავი შრომისა და საქმის სიყვარულის შედეგი იყო”, — დასძინა თორნიკემ.
თორნიკე წლევანდელ ბახმაროს დოღშიც იღებს მონაწილეობას და ამასთანავე, არც სხვადასხვა სპორტულ დოღებს აკლდება. “გარდა ბახმაროს დოღისა, ცხენოსნები აქტიურად ვმონაწილეობთ სპორტულ დოღებში. ეს დოღები გაზაფხულიდან იწყება და თითქმის ოქტომბრამდე გრძელდება. იქ სხვა გარბენებია, ასევე ცხენები დაყოფილია წლოვანების მიხედვით და მხოლოდ სუფთა სისხლის ცხენები იღებენ მონაწილეობას. სპორტის სხვა სახეობების მსგავსად, ჩვენც ყოველდღიურად ვვარჯიშობთ და შეჯიბრებისთვის აქტიურად ვემზადებით”, — ამბობს თორნიკე თოდრია.
ბახმარო, რომელიც ზღვის დონიდან 2050 მეტრზე მდებარეობს და დაუვიწყარი ხედებითაც გამოირჩევა, 19 აგვისტოს ცხენოსნებსა და სპორტის ამ სახეობის გულშემატკივრებს კიდევ ერთხელ უმასპინძლებს. როგორც თორნიკე აღნიშნავს, დოღი ცხენოსნების მსგავსად მაყურებლისთვისაც დიდი დღესასწაულია.
“როცა ამ ყველაფერს ახლოდან უყურებ, სიტყვებით შეუძლებელია იმის გადმოცემა, თუ რა გრძნობაა ეს მაყურებლისთვის და რა სიამოვნებას იღებს. მით უმეტეს, გზა ძალიან ექსტრემალურია, რაც ბახმაროს დოღს სანახაობრივს ხდის. შეიძლება, გარედან შესახედად ვინმეს შეჯიბრი მარტივი მოეჩვენოს, თუმცა თავად მხედრისთვის ეს საკმაოდ რთული გზაა. ამ დღეს მხედრებისა და სპორტსმენების გულშემატკივრები სპეციალურად ჩამოდიან, რათა თავიანთ ფავორიტებს მხარი დაუჭირონ “, — ამბობს თორნიკე.
ბახმაროს თასი 2023-თვის მზადება უკვე დაიწყო. შარშანდლის მსგავსად, სპორტული ღონისძიების ფარგლებში წელსაც 4 გარბენი შედგება. ბახმაროს თასი 2023-ის ერთ-ერთი გენერალური სპონსორი, ტრადიციულად, საქართველოს ბანკია. ბახმაროს დოღის ისტორიაში ფულადი საპრიზო ფონდი წელს ყველაზე მასშტაბური — 20,000 ლარი იქნება.