გონივრულად განხორციელებულ ინვესტიციას ნამდვილად შეუძლია დიდძალი სიმდიდრისა და დოვლათის შექმნა, თუმცა ინვესტიციის განხორციელება ხშირად სულაც არ არის ისეთი მარტივი, როგორიც ეს ერთი შეხედვით ჩანს. გლობალურ საფინანსო ბაზრებთან კავშირის დამყარება საკმაოდ რთული ამოცანაა, რომელსაც Galt & Taggart-ის გუნდი უკვე წლებია, წარმატებით ართმევს თავს.
2000 წლიდან მოყოლებული, საინვესტიციო ბანკი მომხმარებელს ტრადიციულ საბროკერო მომსახურებას სთავაზობს, თუმცა ტექნოლოგიურ პროგრესთან ერთად, 2015 წელს Galt & Taggart-მა ბაზარს ახალი ონლაინ პლატფორმა G&T Trader-ი შესთავაზა, რომელმაც საფონდო ბირჟებზე ვაჭრობის პროცესი მნიშვნელოვნად გაამარტივა.
Galt & Taggart-ის პლატფორმა უნივერსალური ინსტრუმენტია, რომელიც ერგება როგორც დამწყები ინვესტორების, ასევე პროფესიონალი ტრეიდერების მოთხოვნებსა და საჭიროებებს. G&T Trader-ის მეშვეობით მომხმარებელს წვდომა აქვს მსოფლიოს 45-ზე მეტ წამყვან საფონდო ბირჟაზე განთავსებულ 35,000-მდე სხვადასხვა სახის ფინანსურ პროდუქტთან. პლატფორმაზე ხელმისაწვდომია: კომპანიების აქციები, საბირჟო ფონდები (ETF), კორპორაციული და სახელმწიფო ობლიგაციები, CFD პროდუქტები, ოფციონები, სავალუტო წყვილები და ფიუჩერსები.
საინვესტიციო ბანკში კარგად ესმით, რომ პროდუქტის სრულყოფის პროცესი უწყვეტად უნდა გაგრძელდეს და ამჯერად Galt & Taggart-ის გუნდმა მასშტაბური განახლება წარმოადგინა, რომელიც G&T Trader-ის ტექნიკურ შესაძლებლობებს მნიშვნელოვნად ზრდის, საკომისიო ხარჯებს კი მკვეთრად ამცირებს.
განახლება მრავლისმომცველია, თუმცა შევეცადეთ რამდენიმე მნიშვნელოვანი სიახლე გამოგვეყო:
- აპლიკაცია აღიჭურვა უსაფრთხოების დამატებითი ფუნქციონალით, კერძოდ, სახის ამოცნობის სისტემით (Face ID) და თითის ანაბეჭდის სენსორით;
- პლატფორმას დაემატა როგორც მუქი თემის (Dark Mode), ასევე თეთრი თემის (White Mode) არჩევანი;
- წინა ვერსიებთან შედარებით, აპლიკაცია უფრო სწრაფი, მოქნილი და კომფორტული გახდა;
- G&T Trader-ით ამერიკულ საფონდო ბირჟებზე ვაჭრობის მინიმალური საკომისიო $15-დან შემცირდა $5-მდე;
- CFD პროდუქტებით ვაჭრობის მინიმალური საკომისიო შემცირდა $20-დან $10-მდე.
ტრეიდინგ პლატფორმასთან მიმართებით განახლებები და ცვლილებები ნამდვილად უხვადაა, თუმცა რომელია მათ შორის ყველაზე მნიშვნელოვანი და რატომ გადაწყვიტა G&T-ის გუნდმა აღნიშნული ცვლილებების დანერგვა? – ამ შეკითხვებზე Galt & Taggart-ის საბროკერო მიმართულების ხელმძღვანელი, დავით ნიშნიანიძე გვპასუხობს:
„პირველ რიგში, ყველაზე მნიშვნელოვანია ის, რომ ტრეიდინგ პლატფორმის მეშვეობით მომხმარებელს ახლა უკვე გაცილებით უფრო სწრაფად, დაცულად და კომფორტულად შეეძლება საერთაშორისო ბირჟებზე ვაჭრობა. მეორე ძირითადი ცვლილება საკომისიო ხარჯების შემცირებას უკავშირდება. მოგეხსენებათ, მსოფლიოში ყველაზე მოთხოვნადი ნიუ-იორკისა და Nasdaq-ის საფონდო ბირჟებია, ჩვენ კი ამ მიმართულებით ამერიკული კომპანიების აქციებით ვაჭრობის საკომისიო ხარჯები სამჯერ შევამცირეთ; CFD პროდუქტებით ტრეიდინგი კი ორჯერ გავაიაფეთ. თავად ამ ცვლილებებამდე ბაზრის კვლევის შედეგად მივედით – ეს იყო ის, რაც მომხმარებელს სურდა“, – აცხადებს დავით ნიშნიანიძე.
Galt & Taggart-ის საბროკერო მიმართულების ხელმძღვანელი განმარტავს, რომ პლატფორმა გათვლილია როგორც დამწყებ, ასევე გამოცდილ ინვესტორებზე. G&T Trader-ის დახმარებით მარტივადაა შესაძლებელი როგორც გრძელვადიანი ინვესტიციის განხორციელება, ასევე ყოველდღიურ რეჟიმში ტრეიდინგიც, რაც მაქსიმალურად აქტიურ ვაჭრობას მოიცავს.
გადაწყვეტილების მიღების პროცესში ინვესტორებს შეუძლიათ დამხმარე ხელსაწყოები გამოიყენონ, მაგალითად: Watchlist, Screener და Research, რაც ტექნიკური ანალიზისთვის საჭირო ხელსაწყოებს, ინდიკატორებს, მონაცემებსა და ანგარიშებს მოიცავს. პლატფორმიდან გაუსვლელად ინვესტორებს შეუძლიათ: გაეცნონ მიმდინარე სიახლეებს, თვალი გადაავლონ ფინანსური შედეგების კალენდარს და მიიღონ საჭირო ინფორმაცია საფინანსო ბაზრებთან დაკავშირებით. გარდა ამისა, პლატფორმა აღჭურვილია საინვესტიციო პორტფელის ანალიზის ფუნქციონალით, რაც მომხმარებელს აძლევს როგორც ყოველდღიური, ასევე კვარტალური თუ წლიური ანგარიშების მომზადების საშუალებას.
G&T Trader-ის პლატფორმა ხელმისაწვდომია: მობილური აპლიკაციის (Apple Store და Google Play), დესკტოპ ვებგვერდის და ტაბლეტის ფორმატში. გარდა ამისა, გამოცდილ პროფესიონალებს G&T Trader PRO-ს გადმოწერაც შეუძლიათ, რომელიც მომხმარებელს მრავალფეროვან ფუნქციონალს, კომპლექსურ ინდიკატორებსა და გაფართოებულ ტექნიკურ შესაძლებლობებს სთავაზობს.