ხელოვნური ინტელექტის განვითარების მიმართულებით 2023 წელი განსაკუთრებით აქტიური აღმოჩნდა: OpenAI-ს მიერ შექმნილმა ChatGPT-მ სულ რაღაც სამ თვეში 100 მილიონი მომხმარებლის დაგროვება შეძლო, რაც რეკორდულად სწრაფი მაჩვენებელია.
ტექნოლოგიური ფრონტის წინა ხაზზე მხოლოდ OpenAI-ს მფლობელი კომპანია Microsoft-ი ნამდვილად არ არის, ხელოვნური ინტელექტის განვითარებაზე ასობით სხვა ტექნოლოგიური კომპანია მუშაობს, მათ შორისაა Google-იც, რომელმაც საზოგადოებას ChatGPT-ის პირდაპირი კონკურენტი Bard-ი წარუდგინა.
ექსპერტების შეფასებით, ხელოვნური ინტელექტი ისეთივე რევოლუციური და ყოვლისმომცველი ინოვაცია იქნება, როგორიც ინტერნეტი იყო. პოტენციურად, ხელოვნურ ინტელექტს პროდუქტიულობის დრამატულად გაზრდა და გარკვეული სამუშაოებისა თუ პროფესიების ჩანაცვლებაც კი შეუძლია. AI-ს განვითარების საწყის ეტაპზე ჩვენ უკვე ვხედავთ გენერაციული ალგორითმის შთამბეჭდავ შესაძლებლობებს, ფერწერული ნახატის შექმნით დაწყებული და სათავგადასავლო რომანის შეთხზვით დასრულებული.
ზუსტად რა მასშტაბებს მიაღწევს AI-რევოლუცია და რამდენად დიდი იქნება ხელოვნური ინტელექტის როლი ადამიანის ცხოვრებაში, ამ ეტაპზე ამის განჭვრეტა საკმაოდ რთულია. თუმცა ფაქტია, რომ მსოფლიოს უმსხვილესი კომპანიები ამ ტექნოლოგიაზე დიდ ფსონს დებენ, ამ შესაძლებლობით სარგებლობის საშუალება კი არა მარტო უმდიდრეს ინვესტორებს, არამედ ჩვეულებრივ მოქალაქეებსაც აქვთ.
Galt & Taggart-ის გუნდმა ინდუსტრიის პოტენციალთან დაკავშირებით ანალიტიკური ანგარიშიც მოამზადა, რომელიც საინვესტიციო გადაწყვეტილების მიღების პროცესში დაგეხმარებათ. ანალიტიკოსების შეფასებით, ხელოვნური ინტელექტის უდიდესი პოტენციალი, პირველ რიგში, იმ ფაქტითაა განპირობებული, რომ AI-ს დანერგვა არა მხოლოდ ერთ ან ორ ინდუსტრიაში, არამედ ზოგად ეკონომიკაში იქნება შესაძლებელი. პროდუქციის წარმოების, კომპანიის მართვის, თანამშრომლებს შორის კომუნიკაციის, პროდუქციის მიწოდების თუ შემდეგ უკვე პროდუქტის ექსპლუატაციის პროცესშიც კი ხელოვნური ინტელექტის ინტეგრირება შესაძლებელი იქნება. ეს კი დიდი მონაცემების დამუშავების პროცესს გაამარტივებს, კომპანიების საქმიანობას უფრო ეფექტიანს გახდის, და საბოლოოდ, მომხმარებლისთვის უკეთესი პროდუქტისა თუ სერვისის მიწოდებას უზრუნველყოფს.
Galt & Taggart-ის ანალიტიკოსის და კვლევის ერთ-ერთი ავტორის, გიგი ცქიტიშვილის შეფასებით, ხელოვნური ინტელექტი ამჟამად განვითარების ისეთივე ეტაპზეა, როგორზეც 1990-იან წლებში ინტერნეტი იყო.
“ინტერნეტის განვითარების შემთხვევაში, თავდაპირველად, მუშაობა მიმდინარეობდა არა უშუალოდ მზა პროდუქტების და სერვისების შექმნაზე, არამედ ექსპერიმენტული პროექტების განხორციელებაზე და კვლევაზე. მართალია, გარკვეული პროდუქტები მაშინაც იქმნებოდა, თუმცა მათი მყისიერი კომერციალიზაცია არ ხდებოდა. ინტერნეტის განვითარებას გარკვეული დრო დასჭირდა, ხელოვნური ინტელექტის შემთხვევაშიც ანალოგიური ვითარებაა. აქამდე AI მხოლოდ ავტოინდუსტრიაში გამოიყენებოდა ავტოპილოტის სახით, მიმდინარე წელს კი პირველად ვიხილეთ მუშა ჩატ-ბოტები (ChatGPT და Bard). შეგვიძლია ვივარაუდოთ, რომ მომდევნო ხუთი წლის განმავლობაში ხელოვნური ინტელექტი სწრაფი განვითარების ფაზაში გადავა და ამ პერიოდში ბევრი საინტერესო და სასარგებლო პროდუქტი თუ სერვისი შეიქმნება, საბოლოოდ კი, რა თქმა უნდა, მათი კომერციალიზაციაც მოხდება”. – აცხადებს გიგი ცქიტიშვილი.
რაც შეეხება საინვესტიციო შესაძლებლობას, Galt & Taggart-ის ანალიტიკური დეპარტამენტის შეფასებით, პოტენციურად დიდი სარგებლის მიღება ARK Invest-ის სავაჭრო ფონდში, ანუ ETF-ში ინვესტირებით იქნება შესაძლებელი. Autonomous Technology & Robotics ETF-ი აერთიანებს ინდუსტრიის უმსხვილეს მოთამაშეებს და ყველაზე ინოვაციური კომპანიების აქციებს, მათ შორისაა: NVIDIA, რომელმაც წელს $1-ტრილიონიან საბაზრო კაპიტალიზაციას მიაღწია, აგრეთვე ამ ETF-ში ვხვდებით Tesla-ს, Google-ისა და სხვა ტექნოლოგიური კომპანიების აქციებსაც.
გიგი ცქიტიშვილის შეფასებით, ზემოხსენებული ETF-ის მთავარი უპირატესობა ისაა, რომ მის შედგენასა და კვლევაზე ARK Invest-ის გუნდმა დიდი დრო და ენერგია დახარჯა, კომპანიების სათითაოდ შესწავლა კი საკმაოდ რთული ამოცანაა, რაზეც ARK-ის მსგავსი საინვესტიციო ჰოლდინგები ყოველწლიურად მილიარდობით დოლარს ხარჯავენ.
წლის დასაწყისიდან დღემდე ამ ETF-ის ღირებულება 21%-ითაა გაზრდილი, AI-ინდუსტრია კი ჯერაც ჩანასახოვან ეტაპზეა. მსოფლიოს წამყვანი საინვესტიციო ბანკების შეფასებით, 2025 წლისთვის AI-ინდუსტრიის მოგება დაახლოებით 57%-ით გაიზრდება, რაც გამორჩეულ საინვესტიციო შესაძლებლობას წარმოადგენს.